Түркістан облысы ет экспорты бойынша Қазақстанда көшбасшы
Түркістан облысында австралиялық мал шаруашылығы әдісін қолданатын бес жоба жүзеге асырылып жатыр. Бұл туралы ҚР АШМ баспасөз қызметі мәлім етті.
Өңірде австралиялық мал шаруашылығы әдісі бойынша жалпы құны 55,2 млрд теңгені құрайтын бес ірі инвестициялық жобаны іске асыру жоспарланып отыр.
Оның ішінде «Кайып Ата» ЖШС-нің үш инвестициялық жобасы бар.
Мәселен, 2025 жылы Арыста компания 25 мың бас ірі қара мал бордақылау кешенін іске қосады. 2025-2026 жылдары Сайрам ауданында қуаттылығы 1500 бас ірі қара мал сою және өңдеу кешені мен мал биржасы іске қосылады.
«Өңір ет экспорты бойынша Қазақстанда көшбасшы болып табылады, облыс үлесіне экспортталатын ІҚМ етінің 80% және қой етінің 75% тиесілі. Ағымдағы жылдың жеті айында 6,9 мың тонна сиыр еті мен 4,7 мың тонна қой еті экспортталды», — делінген хабарламада.
«Туран Агро Ет-Сут» және «Кайып Ата» ірі кәсіпорындары етті Өзбекстанға, Иранға және Тәжікстанға экспорттайды.
Атап айтқанда, «Кайып Ата» Тәжікстанмен 110 тонна ет экспортына келісімшарт жасасты, жеткізілім басталды.
Айта кетейік, Түркістан облысында 1,1 млн бас ірі қара, 5,3 млн қой, 474,7 мың жылқы, 43,9 мың түйе және 2,2 млн бас құс бар. Жеті айда облыста 112,8 мың тонна ет, 280,2 мың тонна сүт және 143,6 млн жұмыртқа өндірілді.
Облыста ІҚМ үшін 9183 бордақылау алаңы жұмыс істейді, оның ішінде сыйымдылығы 400-ден 1000 басқа дейінгі 13 алаң және сыйымдылығы 1000 басқа дейінгі 22 алаң.
Еске сала кетейік, бұған дейін Тәжікстанға алғаш рет Түркістан облысынан 16 тонна ірі қара мал еті экспортталғанын жазған болатынбыз.
