Тұрғын үй үшін зейнетақы жинағындағы ақшаны қалай аламыз

ҚР Индустрия және инфрақұрылымдық даму министрлігі тұрғын үй үшін зейнетақы қаражатын алу туралы бекітілген ережені жариялады.

Бір жолғы зейнетақы төлемдерін мына мақсаттарда пайдалануға рұқсат етіледі:

— тұрғын үйді сатып алу-сату, жекешелендіру, бөліп төлеу, айырбастау шарттары бойынша, үлестік қатысу туралы заңнамаға сәйкес кепілдік болған кезде тұрғын үй құрылысына үлестік қатысу туралы шарттар бойынша толық есеп айырысу;

— жер сатып алуды есептегенде, жеке тұрғын үй салуға;

— ипотекалық тұрғын үй қарызын алу үшін бастапқы жарнаны енгізу;

— ипотекалық тұрғын үй қарызын алу, берешекті ішінара немесе толық өтеу, қайта қаржыландыру;

— ислам банкінің қаржыландыруы шеңберінде тұрғын үйді сатып алу, ислам банкінің тұрғын үй сатып алу жөніндегі мəмілені қаржыландыруы шеңберінде берешекті ішінара, толық өтеу;

— сатып алу құқығымен тұрғын үйді ұзақ мерзімді жалдау шарттары бойынша берешекті ішінара немесе толық өтеуге міндетті.

Біржолғы зейнетақы төлемдері шексіз рет пайдаланылады.

Өтініш берушінің жұбайы және (немесе) жақын туыстары атынан берілетін біржолғы зейнетақы төлемдерін алушы пайдалануы үшін тараптар жеке кабинетте біржолғы зейнетақы төлемдерін беру туралы келісім жасасады.

Ата-аналар, балалар, асырап алушылар, асырап алынғандар, ата-анасы бір және ата-анасы бөлек аға-інілері мен апа-сіңлілері, атасы, әжесі, немерелері жақын туыстар болып есептеледі.

Алушының меншігінде тұрғын үйі болуы біржолғы зейнетақы төлемдерін алуына және пайдалануына кедергі болмайды.

Тұрғын үй жағдайларын жақсарту үшін біржолғы зейнетақы төлемдерін пайдалану қолма-қол ақшасыз тəсілмен жүзеге асырылады.

Біржолғы зейнетақы төлемдерін алушының жұбайынан (зайыбынан), жақын туыстарынан жылжымайтын мүлік сатып алуға пайдалануға жол берілмейді.

Біржолғы зейнетақы төлемдерін пайдалана отырып, меншікке рәсімделген жылжымайтын мүлікті бес жыл бойы сатуға болмайды. Егер мүлік сатылса, зейнетақы төлемдерінің сомасын қайтаруға тура келеді. Норма өтеу мерзімі бес жылдан асатын және олар бойынша өтелмеген берешегі бар ипотекалық тұрғын үй қарыздарына ғана қолданылады. Яғни, егер ипотека бұрын төленген болса, мораторий алып тасталады.