Тоқаев жазушы Сәбит Досановтың өмірден өтуіне байланысты отбасы мен жақындарына көңіл айтты
Мемлекет басшысы Қасым-Жомарт Тоқаев жазушы Сәбит Досановтың отбасы мен жақындарына көңіл айту жеделхатын жолдады. Бұл туралы Kznews.kz ақпарат агенттігі хабарлайды.
Бұл туралы Ақорда жазды.
Президент Қасым-Жомарт Тоқаев көрнекті қаламгер, драматург, «Отан» орденінің иегері, Мемлекеттік және М.Шолохов атындағы халықаралық сыйлықтардың лауреаты Сәбит Досановтың дүниеден өтуіне байланысты оның отбасы мен жақын туыстарына көңіл айтты.
“Сәбит Айтмұханұлы қазақ әдебиетінің өркендеп қанат жаюына елеулі үлес қосты. Ұлттық проза мен драматургияның дамуына нағыз шығармашыл тұлға ретінде бар саналы ғұмырын арнады. Көркем туындылары сүйікті оқырмандарының тарапынан жоғары бағаланды. Соңына өшпес әдеби бай мұра қалдырған Сәбит Айтмұханұлының жарқын бейнесі халқымыздың жүрегінде мәңгі сақталады. Марқұмның иманы саламат, жаны жәннатта болсын, – деп жазылған жеделхатта.
