Тоқаев Ресей, Беларусь және Қырғызстан президенттеріне орден тақты
Қысқа сілтеме алу
ЕАЭО елдері басшылары Қазақстанмен ынтымақтастықты тереңдетуге қосқан айрықша үлесі үшін марапатталды
НҰР-СҰЛТАН, 28 мамыр — Sputnik. Қазақстан президенті Қасым-Жомарт Тоқаев Ресей, Беларусь және Қырғызстан президенттерін мемлекеттік наградамен марапаттады, деп хабарлады Ақорданың баспасөз қызметі.
Мемлекет басшысы Ресей Федерациясының президенті Владимир Владимирович Путинді, Беларусь Республикасының президенті Александр Григорьевич Лукашенконы, Қырғыз Республикасының президенті Сооронбай Шарипович Жээнбековті Еуразиялық интеграция идеясының 25 жылдығына және Еуразиялық экономикалық одақ туралы шартқа қол қоюдың 5 жылдығына орай, сондай-ақ Қазақстан Республикасымен ынтымақтастықты тереңдету мен кеңейтуге қосқан айрықша үлесі үшін «Қазақстан Республикасының Тұңғыш Президенті — Елбасы Нұрсұлтан Назарбаев» орденімен наградтау туралы жарлыққа қол қойды.
Естеріңізге сала кетейік, 29 мамырда Нұр-Сұлтанда Жоғары Еуразиялық экономикалық кеңестің отырысы өтеді, ол екі мерейтойлық дата – Қазақстанның тұңғыш президенті – Елбасы Нұрсұлтан Назарбаевтың еуразиялық интеграция туралы идеясына 25 жыл және Еуразиялық экономикалық одақ туралы шартқа қол қойылғанына 5 жыл толуына орайластырылмақ.
Іс-шараға Елбасы Нұрсұлтан Назарбаев, мемлекет басшысы Қасым-Жомарт Тоқаев, Беларусь президенті Александр Лукашенко, Қырғызстан президенті Сооронбай Жээнбеков, Ресей президенті Владимир Путин, Армения премьер-министрі Никол Пашинян қатысады.
Молдова президенті Игорь Додон ЕАЭО жанындағы бақылаушы- мемлекет басшысы, Тәжікстан президенті Эмомали Рахмон мен ТМД атқару комитетінің төрағасы Сергей Лебедев құрметті қонақ ретінде қатысады.
sputniknews.kz
