Тоқаев Назарбаева мен Маминді қабылдады

8 сәуірде Қазақстанның уақытша президенті Қасым-Жомарт Тоқаев Ақордада сенат спикері Дариға Назарбаеваны, премьер-министр Асқар Маминді, Конституциялық Кеңесінің төрағасы Қайрат Мәмиді, мәжіліс төрағасының орынбасары Владимир Божконы қабылдады.

Кездесу барысында елдің ішкі саясатына қатысты өзекті мәселелер талқыланды. Бұл туралы Ақорданың баспасөз қызметі хабарлады.

Қазақстанда 30 жылға жуық билік құрған Назарбаев 19 наурызда кенеттен президент қызметінен кететінін жариялаған. Ол мәлімдемесінде сайлау өткенше Қасым-Жомарт Тоқаев президент болатынын айтқан. Тоқаев 20 наурызда ант беріп, қызметіне кіріскен.​ Тоқаевтың орнына Нұрсұлтан Назарбаевтың үлкен қызы Дариға Назарбаев сенат спикері болып тағайындалған.