Тоқаев мемлекеттік орган басшыларының сыртқы қауіп-қатерге дайындығын тексерді
Қысқа сілтеме алу
Қазақстан президенті Қасым-Жомарт Тоқаев қорғаныс министрлігінде өткен стратегиялық командалық-штабтық оқу-жаттығуларға қатысты
НҰР-СҰЛТАН, 22 қараша – Sputnik. Бүгін қарулы күштердің жоғарғы бас қолбасшысы Қасым-Жомарт Тоқаевтың басшылығымен қорғаныс министрлігінде стратегиялық командалық-штабтық оқу-жаттығулары өтті. Шараға мемлекеттік органдардың бірінші басшылары қатысты, деп хабарлайды Ақорданың баспасөз қызметі.
«Оқу-жаттығу барысында елімізге төнетін сыртқы қатерлерді болдырмау үшін әскери және әскери емес сипаттағы мемлекеттік шараларды жүзеге асыру мәселелері пысықталды», — делінген ақпаратта.
Мемлекет басшысына оқу-жаттығулардың негізгі міндеттері мен кезеңдері туралы мәлімет берілді. Аталған оқу-жаттығулар қазіргі сын-қатерлерді ескере отырып, Қазақстан Республикасының қорғаныс жүйесі мен әскери қауіпсіздігін сақтау мақсатында ведомствоаралық іс-қимылдарды нығайтуға бағытталған.
Қасым-Жомарт Тоқаев стратегиялық командалық-штабтық оқу-жаттығуларына қатысты
Тоқаев әскери қауіпсіздік саласындағы нормативтік-құқықтық актілерді жетілдіру, сондай-ақ қорғаныс жүйесі алдындағы міндеттерді шешу үшін мемлекеттік органдарды дайындау шараларын жолға қою жөнінде бірқатар тапсырма берді.
Оқу-жаттығу соңында мемлекет басшысы өздерінің әскери борыштарын атқару кезінде қаза тапқан Қазақстан армиясының сарбаздары мен офицерлерінің рухына тағзым етті.
sputniknews.kz
