Тәуелсіздік күнін тойлауға тың ұсыныс

«Нұр Отан» партиясы төрағасының бірінші орынбасары Мәулен Әшімбаев Facebook-тағы парақшасында тәуелсіздік күнін тойлауға қатысты жазба жариялады. Оның айтуынша, айтулы мерекені ардақтау мемлекеттік деңгейдегі мерекелік іс-шаралармен шектелмеуі тиіс. Бірінші орынбасардың бұл үндеуі расымен көпшілікке ой тастарлықтай. Өйткені егемендік тойын тойлауға үлес қосу – әр адамның міндеті. Осы ретте Мәулен Әшімбаев бірқатар идеялармен де бөлісті.

«Енді санаулы күндерден кейін елді­гіміздің бойтұмарындай болған Тәуелсіздік күнін тойлаймыз. Бұл – халқымыз үшін аса қасиетті әрі қастерлі мереке. Өйткені біз азаттықтың арқасында әлемдік қа­уым­дас­тыққа етене еніп, оның толық мүшесі атан­дық. Ешкімге жалтақтамай, ерте­ңі­мізді өзіміз бағамдайтын, саясатымызды ұлт­тық мүддеге сай жүргізетін деңгейге жеттік.
Елбасымыздың дана басшылығы­мен тәуелсіздік жылдарында ел дамуының жаңа экономикалық және саяси негізі қалыптасты. Халықтың әл-ауқаты мен әлемдік деңгейдегі абырой-беделіміз де айтарлықтай арта түсті. Сондықтан Тәуелсіздік күнін атап өтуде Отанға деген махаббаттың жарқын үлгісін көрсету әр қазақстандықтың азаматтық борышы бо­луы тиіс. Ол үшін мемлекеттік деңгейдегі мерекелік іс-шаралармен шектелмей, әр адам тәуелсіздік мейрамын тойлауға аз да болса өз үлесін қосуға тырысуы қажет.
Осыған орай, барша жеке кәсіпкерлер мен кәсіпорындарды және халыққа қызмет көрсетіп отырған жеке ұйымдарды Тәуелсіздік күнін нағыз елдіктің, еге­мен­діктің мерекесі ретінде атап өтуге ша­қы­рамыз. Яғни, мереке күндері сөрелер мем­лекеттік рәміздердің түсімен безен­ді­ріліп, қызметкерлер ұлттық нақышқа сай киімдер кисе, сауда орындарында арнайы акциялар мен жеңілдіктер сияқты бірегей бастамалар қолға алынса мерекенің ма­ңы­зы мен мәні одан ары арта түсетіні анық.
Қалай десек те, бұл күндері әр қазақ­стандық мерекелік көңіл күйге бөленіп, барлық қоғамдық орындарда тәуелсіздіктің мәні мен маңызы айқын сезіліп тұруы тиіс. Сол кезде біз ата-бабамыз аңсаған азат­тық­тың бағасын пайымдап, жаңа Қазақ­стан тарихындағы ең ұлық күнге деген құрметімізді көрсетер едік.
Егер осы бастамаға бәріміз бір кісідей атсалысып, өз үлесімізді қоссақ, Тәуел­сіздік күнінің шын мәнінде жалпыұлттық және әр қазақстандықтың асыға күтетін ең басты мерекесіне айналатынына кәміл сенемін» делінген жазбада. Осы бастаманы халық іліп әкетер болса, бұл күннің сәні жылдағыдан бетер кірер еді. Расында, ата-баба аңсаған ардақты күннің өзгелерден ерек болуы шарт.