Тайландта қатты дауыл болуы мүмкін
Табиғаттың тосын жағдайы туралы Тайланд технологиялар және ғылым министрлігі Гидрологиялық және ауылшаруашылық ақпараттар институты өзінің www.tmd.go.th ресми сайтында хабар таратқан. Институт мамандарының мәліметінше, 1962 жылдан бері болмаған тропикалық қатты дауыл Тайланд оңтүстігінің басым бөлігі, Самуи мен Пхукет аралдары және Пхангнга мен Краби провинцияларындағы туристік аймақтарға жақындап келеді. Дәлірек айтқанда, Тайландтың оңтүстігіндегі Сиам шығанағынан Андаманд теңізіне дейін, Самуи, Пхукет, Краби және Пхангнгада жылдамдығы сағатына 65 шақырымға жететін қатты дауыл тұрады.
«Reliefweb» порталында жарияланған институт өкілдерінің мәліметінше 1962 жылы болған тропикалық қатты құйын кезінде 12 провинция қирап, 900-ден астам адам қайтыс болған. Ал алдағы дауыл салдарынан теңіз толқындары 5 метрден асып көтерілуі мүмкін, сондықтан барлық табиғи апаттардың салдарын жою жөніндегі агенттіктерге дайын болу ескертілді. Өйткені дауыл Тайланд пен Мьянмадағы 5,3 миллионға жуық адам мекендеп жатқан аумақты қамтиды деп күтілуде.
The New York Times Тайланд метеорологиялық басқармасының барлық су көліктеріне сенбіге дейін жағада қалуды ескерткенін жазған.
СІМ Тайландтағы жергілікті билік өкілдеріне сілтеме жасай келе, «Пабук» тропикалық дауылының 5 қаңтарда Сиам шығанағынан Тайланд жағалауларына жетуі мүмкін екенін айтады. Ал аталған билік өкілдері жеткізген болжам бойынша, 4 қаңтарда Сураттхани, Накхонситхаммарат, Пхаттхалунг, Сонгкхла, Паттани, Яла, Наратхиват, Краби, Транг және Сатун провинцияларында, 4-5 қаңтарда Пхетбури, Прачуапкхирикхан, Накхонситхаммарат, Пхаттхалунг, Сонгкхла, Паттани, Яла, Наратхиват, Ранонг, Пхангнга, Пхукет, Краби, Транг және Сатун провинцияларында қатты жауын жаумақ.
Сыртқы істер министрлігі Қазақстан азаматтарына төтенше жағдай болғанда министрлік сайтында көрсетілген мәліметтер арқылы Тайландтағы Қазақстан елшілігіне хабарласуды ескертеді.
Айдана ШОТБАЙҚЫЗЫ,
«Егемен Қазақстан»
Дереккөз: http://egemen.kz/
