Сотталған әйел аурухана терезесінен төсектің жаймасымен түсіп, қашып кеткен
Осыған байланысты күзет бөлімінің қызметкері жұмысынан қуылған
Ауруханада сотталған әйел таңға жуық терезе арқылы төсектің жаймасымен түсіп, қашып кеткен. Осы үшін күзетте тұрған әділет лейтенанты қызметінен қуылған. Алайда бұл іс Жоғарғы сотқа жетіп, лейтенант қызметін заңды түрде қайтарды, деп хабарлайды Azattyq Rýhy.
Жоғарғы соттың мәліметінше, қылмыстық-атқару жүйесі мекемесінің режим және күзет бөлімінің бақылаушысы лауазымында қызмет атқарып жүрген аға сержант Р., N4 қалалық ауруханасындағы тергеу-қамаудағы А-ны күзету бойынша қалалық постты қабылдап алып, аурухана бөлмесінің дәлізі маңындағы есіктің қасында болған.
А.-мен тікелей бөлмеде инспектор-психолог әділет лейтенанты Ж. болған. Таңғы сағат 4 шамасында тергеу-қамауға алынған А. оны күзетіп тұрған әділет лейтенанты Ж.-ның ұйықтап кеткенін пайдаланып, төсектің екі жаймасын жылыту батареясына байлап, терезе арқылы төмендеп, көшеге шығып, қашып кеткен.
Кейіннен А. ұсталып, қылмыстық-атқару жүйесі мекемесіне қамалды. Ал қызметтік тәртіпті өрескел бұзғаны үшін Р. қызметінен босатылған.
Дегенмен бұл іспен келіспеген Р., ҚР ІІМ ҚАЖ мекемесіне қатысты жұмысын қайта қалпына келтіру туралы талап қоюмен сотқа жүгінді. Алайда жергілікті соттар жұмыстан босатудың заңдылығын көрсетіп, талап қоюды қанағаттандырудан бас тартты.
Жоғарғы Сот істі қарап, келесі себептер бойынша талап қоюды қанағаттандырды.
«ҚР «Құқық қорғау қызметі туралы» Заңында қызметтік тәртіпті өрескел бұзу негіздерінің нақты тізбесі көрсетілген, бірақ талап қоюшыға тағылған бұзушылық олардың құрамына кірмейді және онымен еңбек шартын бұзуға негіз бола алмайды.
Талап қоюшы (ер адам) әйелді күзетпеуі керек еді, өйткені Қылмыстық-атқару жүйесінің тергеу изоляторындағы адамдарды қорғау және қадағалау қағидаларына сәйкес, егер күдікті немесе айыпталушы әйел ауруханаға жатқызылса, онда оны күзету үшін әйел-бақылаушылар тағайындалады.
Сонымен қатар, жауапкер тарапынан тергеудегіні күзетуді ұйымдастыруда бұзушылықтарға жол берілген және А.-ны терезелері тормен жабдықталмаған, жеке есігі жоқ бөлмеге орналастырған», — делінген Жоғарғы сот хабарламасында.
