Соқпағын таппақ стартап | «Айқын» газеті

«Нұр Отан» партиясы Ақмола облыстық филиалының партиялық тыңдауында аймақтағы «Цифрлы Қазақстан» бағдарламасының жүзеге асырылу барысы талқыланды. Іс-шараға Ақмола облыстық ішкі саясат басқар­масының жетекшісі Гүлжанар Шөкеева, облыстық әкімдік жанынан ашылған Smart Aqmola мекемесінің жетекшісі Ғалымжан Бежентаев, Kazakhstan Innovations қоғамдық қорының төрайымы Мәриям Әбішева қатысып, партия­лықтардың сұрақтарына жауап берді.

Облыстық ішкі саясат басқармасы жетекшісінің сөзіне сенсек, Қазақстанда баламасы жоқ «Smart Рухани Ақмола» мобильді қосымшасы шығарылып, оның ішіне «Рухани жаңғыру» бағдарламасын жүзеге асыруға бағытталған бірнеше жоба енген.
«Цифрлы Қазақстан» бағдарламасы аясында 2013 жылы Ақмола облысында 3 станса пайдалануға беріліп, бүгінде 5 станса құрылысы аяқталған. 2019 жылы тағы қо­сымша 40 стансаның құрылысы жүргізіл­мекші. 2021 жылға қарай барлық облыс көлемінде 40 цифрлы станса жұмыс істеуге көшеді.
Биыл облыс әкімдігі жанынан құрылған Smart Aqmola мемлекеттік мекемесінің жұмыс барысын жетекшісі Ғалымжан Бежентаев баяндады. Оның айтуынша, 2018 жылдың 1 қаңтарынан бастап меди­циналық құжаттаманы элек­тронды түрде жүргізу пилотты жобасына Ақмола облысы енген. Осы арқылы бүгінде аймақ бойынша элек­тронды денсаулық паспорты, онлайн дәрігерге жазылу, халықтың меди­ци­налық барлық жазбаларымен танысуға мүмкіндік бар.
«Бірыңғай геоақпараттық онлайн сер­вис» партиялық жобасы аясында жүзеге асқан ілкімді істер жайында Kazakhstan Innovations қоғамдық қорының жетекшісі Мәриям Әбішева баяндады. Қоғамдық қор бүгінде облыстық кә­сіпкерлік және өнер­кәсіп басқармасымен бірлесіп, «Бірыңғай геоақпараттық онлайн сервис» партиялық жобасын жүзеге асыруды бастап кеткен. Соның нәтижесінде Ақмола облысының ин­терактив картасы жасалған. Осылайша, жеке кәсіпкерлер үшін бос жатқан жер телімдері картаға енгізіліп, толық мағ­лұ­маты да қосарлана жазылған.
Негізгі баяндамашыларды тыңдаған нұротандықтар «Цифрлы Қазақстан» мемлекеттік бағдарламасының Ақмола облы­сында жүзеге асырылуына оң баға берді. Партиялық тыңдауларды қоры­тын­дылай келе партияның облыстық фи­лиалы төрағасының бірінші орын­басары Ғалым Бекмағамбетов цифрлы тех­нологиялардың дамуы ХХ ғасырдың негізгі талабы екенін атап өтті.
– Бірнеше жылдан соң өміріміздің барлық саласында цифрлы технология басымдыққа ие болады. Ауыл шаруа­шылығы, білім беру, денсаулық сақтау, қызмет көрсету саласында белгілі жетіс­тікке жеткіміз келсе, сәйкесінше мықты кадрларды, стартап жобаларды бүгіннен бастап дайындауымыз керек, – деп түйіндеді отырысты ол.

Эльмира ЖАҚСЫБАЙҚЫЗЫ