Сириядағы жаппай қабірлерден 100 мыңнан астам адамның денесі табылуы мүмкін

Құқық қорғау ұйымдары Сириядағы жаппай қабірлерде 100 мыңнан астам адамның денесі болуы мүмкін екенін мәлімдеді, деп хабарлайды «Адырна» ұлттық порталы ABC News-ке сілтеме жасап.

АҚШ-та орналасқан сириялық құқық қорғау ұйымы – Сириялық төтенше жағдайлар бойынша жедел топтың жетекшісі Муаз Мұстафа Дамасктан солтүстікке қарай 40 шақырым жерде орналасқан «үлкен» қабірде 100 мыңнан астам адамның денесі бар екенін мәлімдеді.

Мұстафаның айтуынша, Эль-Кутайфа аумағындағы қабірлер – Дамаск маңындағы жерлеу орындары – тереңдігі 6-7 метр, ені 3-4 метр, ал ұзындығы 50-150 метр болатын «алып орлардан» тұрады. Бұл қабірлерде ерлер, әйелдер, балалар және қарттардың денелері болған.

Кутайфа жерлеу орны әскери бақылауда болған аумақта орналасқан, азаматтық көліктердің жүруіне тыйым салынған.

Бүгінге дейін Дамаск айналасында әрқайсысының тереңдігі 20 метрге дейін жететін жүздеген жаппай қабір табылды. Ондағы денелер бірнеше қабат етіп көмілген.

Башар Асад режимінің құлауы көтерілісшілер мен жергілікті тұрғындардың атақты түрмелерді босатуына әкелді. Қазіргі таңда 100 мыңнан астам адам із-түзсіз жоғалғандар қатарында.

Көтерілісшілер басқаратын Сирияның өтпелі үкіметі, үкіметтік емес ұйымдар мен құтқарушылар 2011 жылдан бері Сирияда із-түзсіз жоғалған адамдардың денелері табылуы мүмкін кең ауқымды түрме және жаппай жерлеу орындарының желісін ашуда.

«Хайят Тахрир аш-Шам» көтерілісшілер тобының жетекшісі Идлибтен оңтүстікке қарай Дамаскқа бағытталған шабуылдан кейін берген мәлімдемесінде, Асад билігі кезінде адам құқықтарын бұзу ісіне қатысы барлардың барлығы жауапқа тартылатынын айтты.

Дүйсенбі күні Сириядан қашып шыққаннан кейінгі алғашқы мәлімдемесінде Башар Асад өз режимінің құлауына «террористердің шабуылын» кінәлады.

Асад азаматтық соғыс басталған 2011 жылдан бері адам құқықтарының бұзылуына қатысты оппозиция мен Батыс елдерінің айыптауларына түсініктеме берген жоқ.