ШЫМКЕНТТЕ ДЕ HIGHVILL ҮЙЛЕР БОЛАДЫ

Шымкенттегі Shymkent Сity жобасына Highvill компаниясы қатысуға ниетті. Алдағы уақытта үшінші мегаполисте  корей компаниясының «ақылды үйлері» бой көтереді. Бұл жөнінде  Астанадағы Орталық коммуникациялар қызметінде Шымкент қаласының әкімі Ғабидолла Әбдірахымов хабарлады. 

Shymkent Сity жобасы аясында 400 гектар аумақта 50 мың тұрғынға арналған соңғы үлгідегі үйлер мен демалыс орындары, саябақ, ойын-сауық және сауда орталықтары салынады.
«Кореяның Highvill компаниясы мен отандық BI group, Базис-A ком­паниялары көпқабатты тұрғын үйлер, әлеуметтік және коммерциялық ны­сандар салуға қызығушылық танытып, Шымкентте кеңселерін ашып жатыр. Highvill компаниясымен Shymkent Сity жобасына 130 млрд теңге салу жөніндегі меморандумға қол қойдық. Компания келер жылы құрылыс жұ­мыстарын бастайды. Компания 60 гектарға тұрғын үй салуды жоспарлап отыр, арнайы саябақ та салады», – деді қала басшысы.
«Нұрлы жол» бағдарламасы шең­берінде 14,4 млрд теңгеге 17 жоба жүзеге асырылғанын айтқан қала басшысы «Пре­зиденттің бес әлеуметтік бастама­сын» орындау үшін «7 – 20 – 25» бағдар­ла­­масына 1 млрд теңгеге 99 өтінім қабыл­­данып, 51-і мақұлданғанын жеткізді.
«Білім беру және денсаулық сақтау саласының қызметкерлеріне жергілікті бюджет есебінен пәтер бағасының ал­ғаш­қы жарнасының 10 пайызына қай­та­рымды негізде көмек беру мезханизмі әзірленіп, Инвестиция және даму ми­нистрлігіне келісім алуға жолданды», – деді.
Оның айтуынша, Шымкентте үшін­ші Автоматтандырылған газ бөлу стан­циясы салынады. Қазіргі уақытта қала халқының 91,6 пайызы табиғи газбен қамтылған. 2019-2020 жылдары үшінші Автоматтандырылған газ бөлу стан­циясы салынып, іске қосылған соң ха­лықты газбен қамтамасыз ету жос­пары толық орындалады. Бүгінде мегаполис хал­қын орталықтандырылған ауыз­сумен қам­ту – 93 пайыз деңгейінде екен. Ендігі мін­дет – бұл жұмысты 100 пайыз орындау.
Ғабидолла Әбдірахымов «Туған жер» жобасы аясында «Отау групп» кәсіп­орыны демеушілігімен 110 орын­ды инклюзивті білім беру орталығы және 320 орынды балабақша пайда­лануға берілгенін айтты. «Қазақстанның киелі жерлері» жобасы бойынша қала­ның тарихи-мәдени ескерткіштердің жетеуі республикалық, сегізі жергілікті киелі жерлер тізіміне еніпті.
«Денсаулық сақтау сапасын арттыру бойынша шетелдердің тәжірибесіне сәйкес үйлердің 1-қабаттарында отбасылық амбулаториялық орталық­тарды аша бастадық. Мысалы, кенеттен дене қызуы немесе қан қысымы көте­рілгенде тұрғындар төменгі қабатқа түсіп, өзіне керек алғашқы медициналық көмекті алады», – дейді.
Ал қаланың ден­сау­лық сақтау жүйесін жақсарту үшін 1 000 орынды көпсалалы аурухана салынбақ, бұл жобаға жеке кәсіпкерлер қаржысы тартылады.

Айдана БЕГІМ