Саратовта поезбен соқтығысқан автобус жүргізушісіне үкім шықты
Сот автобус жүргізушісін Ресей федерациясының қылмыстық кодексінің 264 бабы (жол қозғалысы ережесін бұзу және көлiк құралдарын пайдалануда абайсызда екi немесе одан да көп адамның өлiмiне әкеп соққан іс-әрекет) бойынша айыпты деп танып, екі жарым жылға бас бостандығынан айыруға үкім етті. Қазақстандық жүргізуші жазасын Ресейдің қоныстану колониясында өтейтін болады.
Жол апатына «Саратов — Орал» бағытындағы жолаушылар автобусының темір жол өткеліне шығып кетуі себеп болған.
Оқиға былтыр қарашаның 17-і күні Ресейдің Саратов облысындағы Озинск ауданында болған. Жүк пойызы мен жолаушылар автобусы соқтығысқан. Автобуста жеті адам – екі қазақстандық және бес өзбекстандық азаматтар отырған. Апат салдарынан Өзбекстан азаматтары түгел қаза болған, ал көлік жүргізушісі мен оның көмекшісі – Қазақстан азаматтары ауруханаға жеткізілген.
