Саят Медеуов: «Мейрамбекті қанша мықты десе де, мендей бола алмайды»

Белгілі әнші Саят Медеуов Нартай Аралбайұлына берген сұхбатында көпшіліктің әншілерді бір-бірімен салыстыруына қарсы екенін айтты. Оның ойынша, әркімнің өзіне тән өнері бар. Бұл туралы Kznews.kz ақпарат агенттігі хабарлайды.

Қазіргі кезде көп эстрада жұлдыздарын Димаш Құдайбергенмен салыстырып жатады. Саят Медеуов осыған қатысты пікір білдірді.

“Мен бұған келіспеймін. Бәйгенің атын көкпардың атымен салыстырмайды ғой. Сол сияқты екі әншіні де бір-бірімен салыстырып керек емес. Мені қанша жерден мықты десе де, мен Мейрамбек бола алмаймын. Мейрамбекті қанша мықты десе де, мендей бола алмайды. Бұл шаршы алаңға шығып, күш сынасатындай бокс емес, бұл – өнер. Әркімнің өз деңгейі бар. Егер біз дәл осылай салыстыратын болсақ, қазақ өнері өспейді. Бір Димашпен тоқтау керек болады. Димаштың айтқан әнін мен айта алмауым мүмкін, менің әнім Димашқа келмейді. Димаш – өнері, диапазоны жоғары, қазақты әлемдік деңгейде танытып жүрген әнші. Басқа әншілерді Димаштан төмен қойып, салыстырсаң, сол әншілер Димашты жек көріп, оған қарсы болып шығуы мүмкін. Сондықтан салыстырудың қажеті жоқ”, – дейді Саят Медеуов.