«Рас айтамын, бұл — менің балаларым». Орманнан табылған отбасыға қатысты жаңа дерек айтылды
Мамырдың басында Кемеңгер ауылының тұрғындары орман ішінде жерде ұйықтап жатқан алты баласы бар ата-ананы тауып алған. Бұл отбасының Павлодарға көрші елдерден келгені бұрын хабарланған болатын. Бұл туралы massaget.kz жазды.
Табылған балаларға туу туралы куәліктер тек екі үлкен балаға — 6 және 7 жастағы ағасы мен әпкесіне берілді. Бұл туралы Павлодар әкімдігі Tengrinews.kz тілшісінің сауалына берген ресми жауабында хабарлады. Екі үлкен бала да Павлодар перзентханасында дүниеге келгені анықталды.
«Павлодар полиция басқармасының мәліметінше, 2016 жылы Отбасы Ресей Федерациясының Барнаул бағытымен шекарадан өтті. Олар Павлодарда тұру үшін тіркелу мен құжаттарды ресімдеген жоқ. Үлкен балалары №1 Павлодар қалалық ауруханасында дүниеге келді», — деп түсіндірді Павлодар әкімінің орынбасары Светлана Гладышева.
Екі баланың туу туралы куәліктерінде «әке» бағаны толтырылмаған. Қалған төрт баланы құжаттау сот шешімін алғаннан кейін басталады. Ресми деректерге сәйкес, сәбилердің тууын тіркеу туралы талап арыз да берілген.
«Бұл отбасының кәмелетке толмаған балалары — Украина азаматтары. «Азаматтығы туралы», «Халықтың көші-қоны туралы» Қазақстан Республикасының заңдарына сәйкес кәмелетке толмағандардың анасында Қазақстан азаматтығын алу үшін негіздер мен растайтын құжаттар жоқ. Балалардың анасымен әңгімелесу барысында құжаттарды рәсімдегеннен кейін отбасы Барнаулға барып, тұруды жоспарлап отырғаны анықталды», — деп түсіндірді тілшіге Tengrinews.kz Павлодар Білім бөлімі өкілдері.
Сондай-ақ, отбасының Павлодарда жеке баспанасы болмағаны, тұрғылықты жерін жиі ауыстыратыны да нақтыланды.
«Орманнан табылған кезде отбасы Қазақстан аумағында болуды қайта рәсімдеу үшін Шарбақты ауданына бет алған, бірақ отбасында балаларының жеке басын куәландыратын құжаттары немесе туу туралы куәліктері болған жоқ. Сол үшін кәмелетке толмағандардың ата-анасын әкімшілік жауапкершілікке тарту жоспарда жоқ. Балалар ата-аналарымен бірге болды, олардың өміріне қауіп төнген жоқ», — деп атап өтті Павлодар қаласының білім бөлімі өкілдері.
Еске салайық, мамырдың басында екі ер адам орманда баланың жылаған дауысын естіген, кейін олар көпбалалы отбасы орналасқан жерді көрген. Жергілікті тұрғындар сол сәтте болған оқиғаның барлығын видеоға түсіріп алған.
