Райымбек Сейтметов атындағы театр туралы мәлімет: тарихы мен қызықты деректер

0

Театр бұрынғы Түркістан теміржол мекемесі киноклубының ғимаратында жайғасқан

Театр тарихы

Өнер ордасы 2000 жылы 9 наурызда ашылды. Түркістан қаласының сазды-драма театрының көркемдік жетекшісі болып ҚР Еңбек сіңірген артисі, ҚР Халық артисі, профессор Райымбек Сейтметов тағайындалды.  

Мекеме ғимараты 1938 жылы салынған Түркістан теміржол мекемесінің киноклубы болған. Қайта күрделі жөндеуден өтіп, 2000 жылы театрға берілді.

Сахналанған алғашқы пьеса – түрік қағанаты жайлы баяндайтын «Көк-түріктер» қойылымы.  

2017 жылы өнер ордасына  Райымбек Сейтметовтың есімі берілді. Театр ғимаратында 250 адамға арналған көрермен залы мен мұражай бар.

Театр ұжымы

Директоры — Ержан Исатаев. Жалпы штат саны – 116. Оның ішінде шығармашылық бөлімі — 55. 1 ҚР Мәдениет қайраткері және 2  «Серпер» жастар сыйлығының лауреаты бар.

Театр репертуары

Театр репертуарында 63 спектакль бар, оның 18-і балаларға арналған. Б.Вахапзаденің «Көк-Түріктер», С.Балғабаевтың «Ең әдемі келіншек», У.Шекспирдің «Асауға-тұсау», Қ.Мырза-Әлидің «Әмір-Темір», С.Ахмад «Келіндер көтерілісі», М.Байджиевтің «Қалыңдық пен күйеу», Т.Жандәулетовтың «Еркек», Ш.Мұртазаның «Домалақ ана», Ж.Жұматтың «Абақты ғұмыр», Ш.Уәли-Ханның «Кадет Шоқан», Д.Исабековтың «Құстар фестивалі»,  Ә.Қалдыбаевтың «Әкімнің туған күні»,  Ж.Рахматулланың «Өршіл Рух», С.Оспановтың «Мұңлық – Зарлық», Т.Минулиннің «Диляфрузға төрт күйеу» қойылымдары көрерменге жақсы таныс.

Театр жетістіктері мен жүлделері

2001 жылы театрдың көркемдік жетекшісі Райымбек Сейтметов облыс көлемінде өткізілген «Ең үздік режиссер» бас жүлдесіне ие болды.

Тағы оқыңыз: Антон Чехов атындағы театр туралы мәлімет

2003 жылы ҚР Халық әртісі Райымбек Сейтметов тәуелсіз «Платиналы Тарлан» сыйлығын иеленді.

2003 жылы театр Прага қаласында Еуропаның «Театр өнері» аталымы  бойынша белгіленген алтын медалімен марапатталды.

2006 жылы Түркістан сазды-драма театры Оңтүстік Қазақстан облысының «Жылдың ең үздік мәдениет және өнер мекемесі», «Алтын қанат» номинацияларымен марапатталды.

2008 жылы Ақтауда өткен Қазақстан театрларының XVI республикалық фестивалінде театр ұжымы «Қойылымның ең үздік режиссерлік шешімі үшін» арнайы дипломымен марапатталды.

2009 жылы Қарағанды қаласында өткен ХVII театр фестиваліне Түркістан сазды- драма театры Ерғали Сиябекұлы қойған Д. Исабековтың «Құстар фестивалі» атты мюзикл комедиясымен қатысты. Қоюшы режиссер «Ең үздік режиссер» атанып, «Алтын маска» жүлдесін иеленді.

2011 жылы театр әртістері Гүлзада Айтбаева мен Талғат Қарынбаев «Серпер» жастар сыйлығының лауреаты атанды.

Тағы оқыңыз: Шығыс Қазақстан облыстық қазақ драма театры

2011 жылы «Театр көктемі-2011» республикалық аймақтық театр фестиваліне Ж.Жұматтың «Абақты ғұмыр» қойылымымен қатысып, «Үміт» номинациясын иеленді.

2011 жылы Тәжікстан Республикасының астанасы Душанбе қаласында өткен «Навруз-2011» атты ІІІ- Кәсіби театрлардың халықаралық фестивалінде Б.Вахапзаденің «Көк түріктер» атты тарихи драмасымен өнер көрсетті. Тәжікстан мемлекетінің мәдениет министрі Мирзошохрух Асроридің дипломымен марапатталды.

2013 жылы Жетісайда өткен «Театр көктемі-2013» облыстық кәсіби театрлар фестивалінде өнер ордасы Еврипидтің «Троя ханшасы» атты моно қойылымымен өнер көрсетіп, «Айрықша шығармашылық табысы және әлемдік классиканы насихаттағаны үшін» номинациясымен марапатталды.

2014 жылы «Театр көктемі-2014» облыстық фестивалінде театр труппасы Ж.Жұматтың «Тірі жан» драмасын қойып, «Өзекті мәселені көтергені үшін» номинациясымен марапатталды.

2015 жылы Шымкент қаласында өткен «Театр көктемі – 2015» облыстық театр фестивалінде өнер ұжымы «Көрермен көзайымы» номинациясында және театр актрисасы Әсел Қожабекова «Ең үздік әйел бейнесі» аталымында жеңіске жетті.

Тағы оқыңыз: Жүсіпбек Аймауытов атындағы театр туралы қызықты деректер

2017 жылы Түркі әлемі театрларының «Театр көктемі-2017» халықаралық фестиваліне қатысып, жүлделі 1 орынға ие болды. «Түркі әлеміне ортақ үндестік» номинациясымен марапатталды. Ал қойылымдағы Кико рөлін шеберлікпен сомдағаны үшін Жандос Маханов «Қойылымдағы ұтымды бейне» номинациясының иегері атанды.



sputniknews.kz