Қытай азаматтарының заңсыз көші-қонын ұйымдастырғандар сотталды

Жамбыл облысында ұзақ уақыт бойы Қытай азаматтарының заңсыз көші-қонын ұйымдастырып келген полиция қызметкерлері мен Қытай қазағы сотталды. Бұл туралы 6 наурызда ҰҚК хабарлады.

ҰҚК дерегінше, Қытайдан мигранттарының заңсыз арнасын Тараз қалалық көші-қон полициясы бөлімінің қызметкерлері ұйымдастырған.

5 наурызда Тараз қалалық №2 сотының үкімімен осы іс бойынша көші-қон полициясы бөлімінің бұрынғы басшысы А. Зейдалиев төрт жарым жылға, оның орынбасары Б. Наурызбаев үш жарым жылға сотталды. Олар «лауазымын асыра пайдаланды» және «адамдардың заңсыз көші-қонын ұйымдастырды» деп айыпталған.

Ал Қытайда туған У. Силамбек есімді азамат «делдал» болғаны үшін 4 жылға бас бостандығынан айырылды. Оған «адамдардың заңсыз көші-қонын ұйымдастырды» деген айып тағылған.

ҰҚК Қазақстан аумағында тұруға заңсыз рұқсат алған Қытай азаматтарының құжаттарының күшін жою жағын қарастырып жатқанын хабарлады.