ҚР ҰҚК батыста ұстау операциясын жүргізді (видео)

0
69

Ұлттық қауіпсіздік комитеті Қазақстанның батысында есірткі жеткізуге қатысы бар деструктивті діни ағым жақтастарын ұстады, ҰҚК баспасөз қызметі.

«2021 жылы 13 қаңтарда Атырау облысы бойынша ҰҚК департаменті Ақтөбе облысы бойынша ҰҚКД-мен өзара жедел-іздестіру іс-шараларының нәтижесінде өсімдік тектес есірткі заттарын жеткізу арнасын ұйымдастыруға қатысы бар бір топ адамды ұстады», – делінген хабарламада.

Құқық қорғау органдары Қылмыстық Кодекстің 297-бабы, 3-бөлігі, 3-тармағы (Есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу) бойынша сотқа дейінгі тергеп-тексеруді бастады.

Атырау мамандандырылған тергеу сотының шешімімен күдіктілер қамауда болады.

«Аталған адамдар деструктивті діни ағым ұстанушылары. Тергеу шаралары жалғасып жатыр», – деп толықтырды ҰҚК өкілі.