Қостанай тұрғыны есірткіні әжетхана еденінің астына жасырып келген

0

Тәркіленген есірткінің жалпы салмағы 1 килограмм 600 граммды құраған.

Қостанайлық тәртіп сақшылары ірі көлемде есірткі сақтаған қылмыскерлерді қолға түсірді, деп хабарлайды ҚазАқпарат облыстық ПД баспасөз қызметіне сілтеме жасап.

Қостанай облысы полиция департаментінің ұйымдасқан қылмысқа қарсы күрес басқармасының қызметкерлері жедел-іздестіру шараларын жүргізу барысында екі күдіктіні ұстап, олардан бір жарым килограммның үстінде героин тәркіледі.

«47 жастағы ер адам және 35 жастағы әйелді қолға түсіру операциясы Қостанай қаласының шетіндегі Киевский ауылында жүргізілді. Күдіктілер есірткі затын айлалы тәсілмен сақтаған. Даладағы әжетхана еденінің астында құпия қойма жасаған. Есірткіні шегеге ілінген пакетте сақтаған. Тәркіленген героинның жалпы салмағы 1 килограмм 600 граммды құрады», — деді облыстық ПД баспасөз қызметінің жетекшісі Ирина Беженарь агенттік тілшісіне.

Бүгінде осы факті бойынша Қазақстан Республикасының Қылмыстық кодексі 297 бабы, 3 бөлігімен («Есірткі заттарды өткізу мақсатында заңсыз сақтау») сотқа дейінгі тергеу жүргізілуде. Аталмыш баптың санкциясы мүлікті тәркілеумен қатар, 10 жылдан 15 жылға дейінгі мерзімге бас бостандығынан айыруды көздейді.

Күдіктілер уақытша ұстау изоляторына қамалды.

Telegram арнасындағы маңызды жаңалықтар «zakon.kz». Жазылу!

Дереккөз: https://kaz.zakon.kz/