Қостанай облысындағы өрт әдейі жасалынған қастандық болуы мүмкін — Михаил Козачков
Журналист Михаил Козачков өз телеграмм арнасында Қостанай облысында басылмай жатқан өрттің қайдан шығуы туралы өз мәлімдемесін жасады деп хабарлайды Kznews.kz тілшісі. Оның айтуынша, өрт әдейі жасалынған қастандық болуы мүмкін дейді. Президент Қасым-Жомарт Тоқаевтың Ахмет Байтұрсыновтың 150 жылдық мерейтойына келгенін қаламаған жандардың саяси ойыны болуы да мүмкін деген пікір қалдырды:
«Төтенше жағдайлар министрлігінің мәліметінше, Қостанай облысындағы жалын қырық мың гектардан астам жерді алып жатыр, зардап шеккен аймақта бес елді мекен бар, екі мыңға жуық жергілікті тұрғын эвакуацияланды. Өрт әлі сөндірілген жоқ.
Ал кеше кешке Ақмола облысында да дабыл соғылды. Зеренді ауданында да өрт шықты, бірақ ол жерде бәрін тез сөндіріп үлгерді. Орман аман қалды.
Әрине, елордада талдау жұмысы басталды, әртүрлі нұсқалар қарастырылуда. Органдар мұның себебі саясатпен байланысты болуы мүмкін деп санайды.
30 тамызда Мемлекет басшысының баспасөз хатшысы Президенттің Қостанай облысына, оның ішінде Ахмет Байтұрсыновтың мерейтойын атап өтуге қатысуды жоспарлап отырғанын ресми түрде мәлімдеді. Барлығына алдын-ала хабарланды.
1 қыркүйекте президент Қазақстан халқына Жолдауымен сөз сөйлеп, онда Мемлекет басшысының мерзімінен бұрын сайлануы туралы мәлімдеді, яғни іс жүзінде сайлау науқанын бастауды тапсырды. Ол қай жерде басталады? Әрине, Қостанай облысында, Ахмет Байтұрсыновтың туған жерінде. Онда дайындық белсенді жүргізіліп, киіз үйлер тігіліп, тікұшақ алаңдары асфальтталды. Жергілікті ақсақалдар да дайындалып жатқан шығар. Олар Тоқаевтан сайлауға өз кандидатурасын ұсынуды өтінер еді.
Бірақ, бірнеше күн бұрын Қостанай облысында өрт шықты, орман алқаптарын жалын шарпып кетті. ШҚО-да қорық аймақтарында осындай жағдай орын алып тұратын, бірақ бұл жолы бәрі басқаша. Бес кенттегі жүздеген үйдің бір-ақ сәтте өртеніп кететіндей жағдай бұрын-соңды болмаған.
Байтұрсыновтың мерейтойы тоқтатылды. Тоқаев арнайы орман операциясының қалай ұйымдастырылғанын зерттеуді жоспарлап отыр. Сондықтан, егер диверсанттардың қитұрқы әрекеттерінен өрт шықса, олар қажетті нәтижеге қол жеткізіп, Президенттің жоспарларына араласа алды деген сөз. 5 қаңтардан кейін оның жаулары көбейді.
Алдымен үш, кейін сегіз өрт ошағының бар екені хабарланды. Аймақта жылу бар, жаз ыстық болды. Алайда шілде мен тамыз айларында да мұндай жағдай болған жоқ. Сонда Президент өз мәлімдемесін жасағаннан кейін қостанайлық кәуапшылар дереу демалыс орнына барып, от жағып, оны сөндіруді ұмытып кеткен бе? Қызық…
Бұл жай ғана нұсқа екені түсінікті. Бірақ елде техногендік және басқа да апаттар жиі кездесетіні таңқаларлық. Қостанай облысында өрт шығып, Ақтөбе қаласында қоқыс үйіндісі жанып жатыр, Атырау облысында атмосфераға қандай да бір шығарындылар шығарылуда, Маңғыстау облысында итбалықтар мен балықтар қырылып жатыр, БҚО-да апатты жолдар жөнделмейді, тіпті «Егемен Қазақстан» мемлекеттік газеті де олар туралы сыни мақала шығарды.
Әкімдер бәріне бірдей жауапты емес екені түсінікті, бірақ олар аймақты бақылауда ұстау керек. Биліктегі топ-менеджерлердің тәжірибесінің жоқтығы қынжылтады.
Премьер-министр Әлихан Смайылов бүкіл өмірін елорда дәліздерінде өткізді, АП басшысы Мұрат Нұртілеу негізінен шетелде жұмыс істеді, тіпті ҰҚК төрағасы Ермек Сағымбаев өзінің көп жылғы мансабын президентті қорғауға арнады, тіпті оның «Елбасының 3-ші дәрежелі қауіпсіздігін қамтамасыз еткені үшін» медалі бар.
Бұлардың ешқайсысы Қостанайда болған жоқ. Олар тек жақсы жаңалықтарға, әкім сайлау, мектеп ашу шараларына қатысады. Қазірдің өзінде Қостанайда 43 мың гектар жер жанып жатыр, бірақ аймақта тек Төтенше жағдай министрі ғана бар. Қалғандары тек баяндама тыңдаумен шектеледі. Сондықтан мұндай жағдайда арам ойлылардың қастандық жасауы әбден мүмкін» — дейді журналист.
