Қостанай облысы карантинге жабылатын болды — Қазақстан жаңалықтары

Қостанай облысы 17 сәуірден бастап толықтай карантинге жабылатын болды, деп хабарлайды Stan.kz ақпарат агенттігі.

Бұл туралы облыс әкімі Архимед Мұхамбетов мәлім еттті. 

«Бүгін жедел штаб отырысы өтті. Денсаулық сақтау саласының мамандарын тыңдай келе, 17 сәуір күні сағат 00.00-ден бастап 1-ші мамыр сағат 07.00-ге дейін облыс аумағында карантин енгізу туралы шешім қабылданды. Бұл, халықты коронавирустық инфекциядан қорғау үшін мәжбүрлі шара екенін атап өткім келеді. Мұндай тәжірибе, Қазақстанның басқа облыстарында қолданылуда. Ең алдымен, карантин режимі бізге барлық байланыстарға шектеу қоюға және қауіпті вирустың таралуына жол бермеуге мүмкіндік береді», — деп жазыпты әкім.

Аймақ басшысы жергілікті тұрғындарды бұл жағдайға түсіністікпен қарауға шақырды. 

«Қазір дәрігерлер, полиция қызметкерлері және тіршілікті қамтамасыз ету кәсіпорындарының қызметкерлері күшейтілген режимде жұмыс жасауда. Мен барлықтарыңызды олардың еңбектеріне құрметпен қарауға шақырамын. Біз Сіздермен бірге қолымыздан келгенше оларға көмек көрсете аламыз. Облыстың барлық тұрғындарын карантин жағдайына барынша байыпты қарауды сұраймын. Үйде болып, барлық медициналық ұсыныстарды сақтау қажет. Қымбатты қостанайлықтар!
Өздеріңізді және жандарыңызға жақын жандарды қорғаңыздар! Әрбір отбасыға амандық, барлық қостанайлықтарға мықты денсаулық және сенімділік тілеймін. Біз қаншама рет қиындықтарды бастан өткердік, бірақ әрдайым тек алға жүрдік. Біз барлығын жеңеміз және осы жолы да жеңіске сөзсіз жетеміз. Біз біргеміз!» — дейді Архимед Мұхамбетов. 

Еске салайық, бұған дейін Қостанай облысында бір науқас коронавирустан көз жұмған болатын. Дәрігерлер оның үйінде жатып өз бетінше емделмекші болғанын айтыпты.