Қазақстандықтар бұдан былай жеке куәліксіз жүре алады

Жаппай цифрландыру қазақстандықтарға қалтасына құжат салып жүрмеуге мүмкіндік береді – қосымшаны жүктеп алып, электронды нұсқасын ұсынсаңыз жеткілікті

Қазақстандықтарға eGov mobile қосымшасында жеке куәлікті электронды түрде көрсетуге мүмкіндік беретін қызмет іске қосылды.

Қосымшадағы мұндай функцияны «Ұлттық ақпараттық технологиялар» компаниясының мамандары әзірледі. Құжат қазірдің өзінде Android және iOS жүйелеріндегі барлық eGov mobile қолданушылары үшін қолжетімді.

Тағы оқыңыз: Енді зейнеткерлікке СМС арқылы шығуға болады

«Егер сізде жеке куәлігіңіздің түпнұсқасы болмаса, оны электронды түрде ұсына аласыз. Енді құжаттарды рәсімдеу кезінде, мысалы, нотариуске барғанда eGov mobile қосымшасында өзіңіздің электронды жеке куәлігіңізді көрсетуіңіз қажет. Осыдан кейін сізге QR-кодын қолдану арқылы рұқсат беру функциясы ұсынылады. Нотариус осылайша сіздің құжатыңыздың түпнұсқа екендігіне оңай көз жеткізеді», — деп жазды компания өкілдері Facebook-тегі парақшасында.

eGov mobile қолданушыларына тағы қандай құжаттар қолжетімді

Әзірлеушілердің айтуынша, eGov mobile қосымшасы жұмысқа, салық органдарына, елшіліктерге және басқа да ведомстволарға ұсынуға қажетті анықтамалар мен құжаттарды алуға мүмкіндік береді. Ол үшін халыққа қызмет көрсету орталығына барудың қажеті жоқ.

Авторизация жасау үшін электронды цифрлық қолтаңбаның (ЭЦҚ) болуы және ұялы телефонның нөмірі eGov порталындағы жеке кабинетте тіркелуі қажет. Осыдан кейін мобильді қосымшаны жүктеуге болады:

• сотталмағаны туралы анықтама;
• жылжымайтын мүліктің бар-жоғы туралы анықтама;
• аты, тегі, әкесінің аты өзгергені туралы анықтама;
• неке қию немесе ажырасу туралы анықтамалар;
• туу туралы анықтама;
• зейнетақы қорынан көшірме және тағы басқалар.