Қазақстандық әуе тасымалдаушы компаниялар 14 жаңа бағытты іске қосады — Қазақстан жаңалықтары

Қазақстан Президентімен кездесу барысында премьер-министрдің орынбасары Роман Скляр алдағы уақытта 14 жаңа бағыт іске қосылатындығын айтты, деп хабарлайды Stan.kz ақпарат агенттігі.

Бұл туралы Ақорданың сайтында жарияланды. 

Қасым-Жомарт Тоқаевқа Қазақстанда «ашық аспан» жүйесін құру жөнінде атқарылған жұмыстар туралы баяндалды. Биыл Қатар, Польша, Оман, Беларусь, Малайзия, Румыния, Біріккен Араб Әмірліктері, Кувейт секілді елдердің танымал әуе компаниялары 14 жаңа бағыт ашады деп жоспарлануда. Швейцария, Оңтүстік Корея, Сингапур, Латвия, Литва елдеріндегі авиация саласының басшылығымен келіссөздер жүргізіліп жатыр.

Роман Скляр мемлекет басшысының 2019 жылғы тапсырмалары орындалып, нәтижесінде жаңа 12 бағыт – Елордадан Прагаға, Ұлан-Батырға және Токиоға рейстер ашылғанын хабарлады.

Президент мүдделі мемлекеттермен арадағы әуе қатынастарын кеңейтуді, сондай-ақ, Қазақстанның негізгі әуежайлары арқылы өтетін жүк тасымалының көлемін ұлғайтуды тапсырды.

Қасым-Жомарт Тоқаев авиация саласындағы бәсекелестікті арттырудың маңыздылығын атап өтіп, оның жолаушыларға қызмет көрсету сапасына және азаматтық авиацияны дамытуға оң әсер ететінін айтты.