Қазақстанда 2021 жылға ең төменгі жалақы мен зейнетақы белгіленді

Қазақстанда 2021 жылға арналған ең төменгі зейнетақы мен ең төменгі жалақы белгіленді. Тиісті көрсеткіштер ел президенті қол қойған «2021-2023 жылдарға арналған республикалық бюджет туралы» заңда көрсетілген.

2021 жылдың 1 қаңтарынан бастап Қазақстан:

ең төменгі жалақы — 42 500 теңге ;

мемлекеттік базалық зейнетақы төлемінің ең төменгі мөлшері — 18 524 теңге ;

ең төменгі зейнетақы — 43 272 теңге ;

жәрдемақы мен өзге де әлеуметтік төлемдерді есептеу үшін, сондай-ақ Қазақстан Республикасының заңнамасына сәйкес айыппұлдар, салықтар және басқа төлемдерді қолдану үшін айлық есептік көрсеткіш — 2 917 теңге ;

базалық әлеуметтік төлемдердің мөлшерін есептеу үшін күнкөрістің ең төменгі мөлшері — 34 302 теңге .

Жасы бойынша зейнетақы төлемдеріне және еңбек стажына байланысты зейнетақы төлемдеріне бөлінген қаражат олардың 2021 жылдың 1 қаңтарынан бастап 7 пайызға өсуін ескере отырып беріледі.

2021 жылдың 1 қаңтарынан бастап әлеуметтік медициналық сақтандыру қорына төленетін міндетті әлеуметтік медициналық сақтандыру бойынша мемлекеттік аударымдардың мөлшері мемлекет жарналарын есептеу объектісінің 1,6 пайызын құрайды.

Сонымен қатар, 1 қаңтардан бастап әскери қызметшілерге (мерзімді әскери қызметшілерді қоспағанда) және арнайы мемлекеттік және құқық қорғау органдарының, мемлекеттік фельдъегерлік қызметтердің қызметкерлеріне тұрғын үйді ұстауға және коммуналдық қызметтерге ақы төлеуге ай сайынғы ақшалай өтемақы мөлшері 3 739 теңге.

Естеріңізге сала кетейік, президент Қасым-Жомарт Тоқаев 2 желтоқсанда Қазақстанның 2021-2023 жылдарға арналған бюджеті туралы заңға қол қойды .