Қазақстан полициясы сайлау алдында күшейтілген тәртіпке көшеді

0

Қазақстан ішкі істер министрі Ерлан Тұрғымбаев кезектен тыс президент сайлауы қарсаңында елде қауіпсіздік шаралары күшейтілетінін айтты. 4 маусымда Нұр-Сұлтанда үкімет үйінде журналистер сұрағына жауап берген министр мұндай шара президент сайлауымен байланысты екенін айтты.

«Қоғамдық қауіпсіздікті қамтамасыз ету мақсатында «Құқықтық тәртіп» операциясы өтіп жатыр, сондықтан бүгін қауіпсіздік күшейтілді. Тек Нұр-Сұлтан қаласында ғана емес, республика бойынша [жүріп жатыр]. Шара 6 маусымға дейін жалғасады, ал 7 маусымнан 12 маусымға дейін сайлауға байланысты полиция түгелдей күшейтілген режимде жұмыс істейтін болады» деді министр.

Министр Тұрғымбаев 9 маусымда барлық жерде патруль болатынын, сол күні қоғамдық қауіпсіздікті қамтамасыз етуге 21 мың полиция қызметкері жұмылдырылатынын мәлімдеді.

Алматы полициясы қалада «Құқықтық тәртіп» шарасы аясында екі мыңнан аса полицей қызметке кіріскені туралы хабарлады.

Қазақстанда кезектен тыс президент сайлауы алдағы жексенбі, 9 маусым күні өтеді.

Azattyq