Қазақстан коронавирусқа қарсы күреске 3,5 млрд теңге бөлді

Қаржы министрі Әлихан Смайылов әлемді дүрліктірген індеттен ел бюджетіне салмақ түспейтінін атап өтті

НҰР-СҰЛТАН, 5 қаңтар – Sputnik. Үкіметтің резервінен Қытайдан тараған коронавирусқа қарсы күреске 3,5 миллиард теңге бөлінді. Бұл туралы бірінші вице-премьер, қаржы министрі Әлихан Смайылов мәлімдеді, деп хабарлайды Sputnik Қазақстан тілшісі.

«Үкіметтің резервінен қажетті дәрі-дәрмекті, бетперделер мен құрылғыларды сатып алуға ақша бөлінді. Бұл денсаулық сақтау министрлігінің желісі бойынша. Шамамен 3,5 миллиард теңге бөлінді, ақшаның мақсатты жұмсалуын денсаулық сақтау министрлігі қадағалайды», — деді Смайылов мәжіліс кулуарында.

Қаржы министрі әлемді дүрліктірген індеттен ел бюджетіне салмақ түспейтінін атап өтті.

«Қазір біз вирус Қазақстанда тарап кетпеуі үшін шара қолданып жатырмыз. Егер олар тиімді болса, экономикаға салмақ түспейді. Көрші елдермен, бұл жерде Қытай елін айтып тұрмын, өзара қарым-қатынаста өте радикалды шаралар қабылдауға тура келсе, белгілі бір мөлшерде әсер етуі мүмкін. Бірақ, қазір Қытаймен сауда-саттық жасауға тыйым салынған жоқ», — деді ол.

Тек туризм саласында белгілі бір шектеулер бар, деп жалғастырды ол.

«Біз қазақстандықтарға ол жаққа бармауға кеңес беріп отырмыз. Қытайдағы туризмнен Қытайға ақша түседі, егер біздің азаматтар ол жаққа бармаса, ақшамыз елде қалады. Бұл керісінше жақсы», — деді министр.

Қытайдан қанша қазақстандық келді

Қазақстан эпидемия ошағы Уханьнан 83 қазақстандықты, соның ішінде 80 студентті эвакуациялады. Сонымен қатар, 24 шетелдік – Қырғызстанның 18 азаматы, Беларуьстің бес азаматы және Арменияның бір азаматын Қазақстанға жеткізді. Қырғызстандықтар арнайы бортпен Бішкекке жіберілді. Елге жеткізілген қазақстандықтар он төрт күндік карантинге алынды.

4 ақпандағы жағдай бойынша стационарларда 33 адам дәрігерлердің бақылауында жатыр. Қазақстанда коронавирус табылған жоқ. Соңғы деректер бойынша Қытайда 24,3 мың адам коронавирус жұқтырған, 490 адам көз жұмды.