Қазақ балалары Қырымдағы лагерьде жүр: Мектеп басшылығына қатаң ескерту берілді
Бұл туралы Ulysmedia.kz тілшісіне Оқу-ағарту министрі Ғани Бейсембаев айтты.
Әлеуметтік желіде бұл оқиғаны қатаң сынап, министрліктен түсініктеме талап еткендер көп болған. Бүгін ОКҚ-да өткен баспасөз мәслихаты барысында Оқу-ағарту министрлігі Балалардың құқығын қорғау комитетінің төрайымы Насымжан Оспанова ата-аналар өздігінен, білім беру ұйымдарына хабар бермей, аталған аймаққа балаларымен кетіп қалғанын айтады.
«Біз күн сайын сол балалармен байланыстамыз. 25 мамырда қайтып келеді деп күтіп отырмыз. Қазіргі таңда олардың өмірі, денсаулығы, көңіл-күйі жақсы. Ата-аналары бірге жүр», — дейді ол.
Ал Оқу-ағарту министрі Ғани Бейсембаев расында да Қазақстандағы заңдар бойынша, ата-аналар өз балаларын түрлі халықаралық конкурстарға қатыстыра алады. Ол жағынан ешқандай шектеу жоқ.
«Бірақ бүгінгі ерекше жағдайға байланысты мынадай шешім қабылданды: келесі жылдан бастап арнайы ұлттық тәрбие жоспарын қабылдаймыз. Яғни бұдан былай бірінші кезекте бүкіл тәрбие жұмыстары жоспар негізінде ұйымдастырылуы тиіс. Екіншіден, осынай келеңсіз жайттарға жол бермеу мақсатында мектеп осындай ұзақ мерзімді сыртқа шығатын балалар туралы бірінші кезекте облыстық білім басқармасы мен балалар құқығы қорғау комитетімен ақылдаса отырып, шешім қабылдауы тиіс», — деді Ғани Бейсембаев.
Оның сөзінше, бұдан былай мұндай мәселелерге тосқауыл қойылады. Министр балалардың қауіпсіздігін қамтамасыз ету үшін нақты шешім қабылданғанын атап өтеді.
«Дей тұрғанмен бұл шаралармен біз шектелмейміз. Ата-аналар форумы өтті. Бұл мәселе сонда көтерілді. Бұл жерде ата-аналардың да жауапкершілігін күшейту мақсаты тұр. Жаңа оқу жылынан бастап барлық мектеп қабырғасында Ата-аналар академиясын құру бастамасын қолға алып отырмыз. Ондағы мақсат – ата-аналарға тиісті заңды ақпараттарды қамтамасыз ету. Өйткені соңғы зерттеулердің нәтижесі бойынша ата-аналардың 60 пайызы өз балаларын тәрбиелеуде психологиялық-педагогикалық көмекке мұқтаж екенін айтып отыр», — дейді ол.
Ғани Бейсембаев Қырымға балаларды жіберген мектеп басшылығы ешқандай заңды бұзып отырған жоқ дегенге келтіреді.
«Бірақ осы жағдайдың ерекшелігін ескере отырып, облыстық білім басқармасы тарапынан бұл мектептерге қатаң ескертулер берілді. Бұл бағыттағы іс-шаралар облыстық білім басқармасы ғана емес, министрлік тарапынан да қатаң бақылауда болады», — деп түйді Ғани Бейсембаев.
