Қасым-Жомарт Тоқаев: жеделхаттар, руы, құттықтау, сапары

0

Мемлекет басшысы сайлаудан кейін әлемнің әр елінен құттықтау хаттарын алуда

НҰР-СҰЛТАН, 15 маусым — Sputnik. Ресей Федерациясының премьер-министрі Дмитрий Медведев Тоқаевқа құттықтау жеделхатын жолдады, деп хабарлайды Ақорда сайты.

Ол Тоқаевтың жетекшілігімен экономика мен әлеуметтік салаларды модернизациялауда, азаматтардың өмір сүру деңгейін арттыруда кең ауқымды жоспарларды жүзеге асыру жалғасатынына сенім білдірді.

«Сіздің тату көрші, одақтас Ресей мен Қазақстан қарым-қатынастарының одан әрі дамуын, Еуразиялық экономикалық одақ аясындағы интеграциялық өзара іс-қимылдарды кеңейтуге бел шеше кірісуіңізді құп көреміз», – делінген құттықтау хатында.  

Президент қызметіне кіріскен Қасым-Жомарт Тоқаевқа Германия канцлері Ангела Меркель де табыс тіледі.

«Елдеріміз арасындағы әріптестік тұрақты дамып келеді. Германия реформалар мен демократияландыру жөніндегі жақын әріптес ретінде Қазақстанға қолдау көрсетуге дайын», – делінген жеделхатта.

Тағы оқыңыз: Тоқаевқа қай өңірдің тұрғындары ең көп дауыс берді?

Үндістанның премьер-министрі Нарендра Моди Қазақстан президентін құттықтап, екі елдің көп ғасыр бұрын басталған ықпалдастықты жалғастырып келе жатқанын айтты.

«Екіжақты ынтымақтастықтың қарқынды дамуының арқасында тарихи байланыстарымыз стратегиялық серіктестікке ұласты. Мемлекеттеріміз бен халықтарымыздың мүддесі үшін Үндістан мен Қазақстанның стратегиялық серіктестігін одан әрі нығайтуға және кеңейтуге дайын екенімді білдіремін», – делінген жеделхатта.

Хорватия президенті Колинда Грабар-Китарович өзінің құттықтау хатында достық ынтымақтастықты одан әрі дамытуға ниетті екенін айтқан.

«Хорватия Қазақстанмен халықтарымыздың ортақ мүдделерін білдіретін көптеген салаларда тұрақты дамып келе жатқан әріптестікті және достық қатынасты жоғары бағалайды. Біз өзара күш біріктіре отырып, ортақ ынтымақтастыққа, соның ішінде екі мемлекеттің әлеуетін іске асыру үшін экономикалық қатынастардың қарқынын арттыруға үлес қосатынымызға кәміл сенемін», – деді ол. 

Словакия президенті Андрей Киска да Қасым-Жомарт Тоқаевты құттықтады.

«Қазақстан – Словакияның Орталық Азиядағы маңызды серіктесі. Елдеріміз арасындағы ынтымақтастық ортақ мүдделерімізді білдіретін барлық салаларда дами беретініне сенім білдіреміз», – делінген жеделхатта.

Болгария Президенті Румен Радев Қасым-Жомарт Тоқаевқа еңбегінің жемісті болуын және Қазақстан халқына бақ-береке тіледі.

Швейцария конфедерациясының президенті Ули Маурер Қазақстан мен Швейцария арасындағы байланыстардың өте жақсы деңгейде екенін атап өтіп, екі мемлекеттің игілігі үшін ынтымақтастықты нығайтуға сенім білдірді.

Тағы оқыңыз: «Халық кедейліктен көшеге шықты»: Тоқаев Қазақстандағы митингілер жайлы

Австрия президенті Александр Ван дер Беллен Қасым-Жомарт Тоқаевқа демократиялық даму және реформаларды жүргізу ісінде табыс тіледі.

«Халықаралық және өңірлік қауіпсіздік пен тұрақтылықты қамтамасыз ету жөніндегі Қазақстанның ұзақ мерзімді қызметі сіздің басшылығыңызбен одан әрі жалғаса беретініне сенімдімін», – делінген жеделхатта.

Латвия Президенті Раймонд Вейонис Қазақстанды Латвияның Орталық Азиядағы маңызды әріптесі әрі мемлекеттер арасындағы қарым-қатынастар конструктивті әрі өзара тиімді екенін атап өтті. 

Қазақстан Президенті болып сайлануына орай Қасым-Жомарт Тоқаевтың атына құттықтау хаттарын Нидерланд Королі Виллем-Александр, Моңғолия президенті Халтмаагийн Баттулга, ЮНЕСКО ұйымының Бас хатшысы секретарь Одри Азуле, Экономикалық ынтымақтастық ұйымының Бас хатшысы Хади Солейманпур, Польшаның бұрынғы Президенті Александр Квасьневский, Бразилия федералды сенатының төрағасы, сенатор Дави Алколумбре Польша Республикасы сенатының маршалы Станислав Карчевский, «Италия-Қазақстан» парламентаралық достық тобының төрағасы Эдмондо Чириелли, Польша-Қазақстан сауда-өнеркәсіп палатасының төрағасы Петр Гузовски, Еуропа парламентіндегі Польша Республикасының депутаты Рышард Чарнецкий, Польшаның сенаторы Ян Филип Либицкий мен сейм депутаты Томаш Ленц жолдаған.



sputniknews.kz