Қарағандыда кәсіпкерлердің мемлекеттік органдарға шағымдарын талқылады

0

Қарағанды облысында кәсіпкерлер негізінен полиция және жергілікті атқару органдары мен салық органдарының қызметіне көп шағымданады. Шағын кәсіп иелерінің көбі сонымен қатар билікпен арадағы мәселесін хабарлауға және жария етуге қорқады. Бұл туралы 20 желтоқсан күні Қарағандыда өткен Кәсіпкерлер құқығын қорғау және сыбайлас жемқорлыққа қарсы іс-қимыл жөніндегі кеңестің жиынында айтылды.

Кеңес жиынында жарияланған мәліметтер бойынша, биыл кәсіпкерлер мемлекеттік органдардың өз қызметтеріне жөнсіз киліккеніне, бизнес жүргізуге жер телімін беруден негізсіз бас тартқанына және мемлекеттік сатып алу мен тексерістің заңсыз жүргізілгеніне жиі шағымданған.

Жиында сонымен қатар кейбір шешімін тапқан проблемалар да айтылды. Мысалға, биыл Қарағандыдағы Ішкі істер министрлігінің академиясына қарасты асхана төңірегінде туындаған дау шешілген. Академиядағы асхананы жалға алған жеке кәсіпкер қызметіне кедергі жасалып отырғанына бірнеше рет шағымданған еді. Осыдан кейін кәсіпкерлер палатасы ішкі істер министріне мәселеге араласуын сұрап хат жазып, мәселе кәсіпкердің пайдасына шешілген.

Бұдан өзге, Қарағандыдағы фирмалардың бірінің директоры құқық қорғау органдары заңға қайшы жұмыс істеді деп арызданған. Директор «заңды бұза отырып шетелден жұмыс күші мен еңбек мигранттарын тартқаны үшін» әкімшілік жауапқа тартылған. Кәсіпкерлер құқығын қорғау және сыбайлас жемқорлыққа қарсы іс-қимыл жөніндегі кеңес төрағасы Серік Төрегелдиннің мәлімдеуінше, кеңес облыстық прокуратураға шағымданған соң кәсіпкерді әкімшілік жауапқа тарту туралы сот шешімі заңсыз деп танылған.

Жиын барысында кеңес мүшелері келер жылдан бастап облыстағы шалғай аудандарға барып, жергілікті бизнес өкілдерімен кездесуді және олардың проблемаларымен танысуды жоспарлап отырғанын айтты.

Дереккөз: Азаттық

Загрузка...

ПІКІР ҚАЛДЫРУ

Пікіріңізді енгізіңіз!
мұнда сіздің атыңызды енгізіңіз