«Қалдық береді»: Желідегі видеодан кейін Алматыдағы мектеп асханасы тексеріліп жатыр
Әлеуметтік желілерде Алматыдағы мектептердің бірінің асханасында оқушыларға тамақ қалдықтарын беріп жатыр деген ақпарат пайда болды.
Алматы қалалық білім басқармасы осыған байланысты түсінік берді.
– №67 мектепте тамақтану сапасына қатысты ақпараттың таралуына байланысты басқарма бейнежазбада баяндалған барлық мән-жайды зерделеу және анықтау үшін тамақтану сапасын бақылау жөніндегі ведомствоаралық топтың жұмыс комиссиясы сол жерге кеткенін мәлімдейді, — деп атап өтті басқармадан.
Барлық мектепте бракераждық комиссия құрылды, оның құрамына мектеп әкімшілігінің өкілдері, әлеуметтік педагог, медицина қызметкері және ата-аналар қоғамының мүшелері кіреді. Берілетін тағамдардың сапасын тексеруді бракераждық комиссиясы айына екі рет, ал мектептің медицина қызметкері күн сайын жүргізеді.
– ҚР Денсаулық сақтау министрінің 2022 жылғы 17 ақпандағы бұйрығымен бекітілген «Қоғамдық тамақтану объектілеріне қойылатын санитариялық-эпидемиологиялық талаптардың» 65-тармағына сәйкес тамақ қалдықтары шығуға жақын орналасқан мектеп асханасының қосалқы нысанындағы арнайы орында жинақталуы тиіс, — делінген хабарламада.
Осыған дейін Алматы мектептерінде оқушыларға берілетін тегін ас мәзіріне ұлттық тағамдар енгізілуі мүмкін екенін жазған болатынбыз.
Былтыр Мемлекет басшысы Қасым-Жомарт Тоқаев ауыл шаруашылығы қызметкерлерінің бірінші форумында мектеп асханасындағы тамақ сапасын арттыру бағытындағы ұстанымдарын айтқан еді.
