Қайрат Әбдірахманов Брюссельде қазақстандық журналистермен кездесті

Қазақстандық бір топ журналистер Брюссельге Еуропалық Одақ институттарының жұмысымен, ЕО-ның Орталық Азия бойынша стратегиясын жаңарту процесімен танысу үшін және «Еуропалық Одақ – Орталық Азия» министрлік конференциясына қатысу үшін Еуроодақ алғаш рет ұйымдастырған баспасөз турымен келген.

Брифинг барысында сыртқы саяси ведомствоның басшысы «Еуропалық Одақ – Орталық Азия» конференциясының және іс-шара аясында өткен екіжақты кездесулердің қорытындысы, өңіраралық әріптестіктің жаңа стратегиясының жобасына ұсынылған қазақстандық тараптың ұсыныстары және жалпы Қазақстан мен Еуроодақ қарым-қатынасы дамуының келешегі туралы әңгімеледі.

Қоғамдағы өзекті мәселелерді айшықтау және қазақстандық медиа сегментінің бәсекеге қабілеттілігін арттыру үшін еуропалық БАҚ-тармен үздіксіз тәжірибе алмасу және байланыстарды нығайту, қоғаммен байланыстың алдыңғы қатарлы технологияларын және қазіргі заманғы әдістерін үйренудің маңыздылығы атап өтілді.

Сондай-ақ, қоғамдық дипломатияны жүзеге асыру мен халықтарды жақындастырудағы БАҚ-тың маңызды рөліне ерекше назар аударылды.

Кездесу қорытындысы бойынша ҚР СІМ басшысы қатысушыларға кәсіби табыс тілеп, Еуроодақ пен Орталық Азия арасындағы көпжақты және екіжақты әріптестік аясында ұсынылатын екі тарап БАҚ-тарының серіктестік бойынша құралдарын белсенді қолдануға шақырды.