Президенттікке кандидаттар отбасының табысын көрсетуі тиіс

Декларация 2019 жылдың 1 сәуіріндегі жағдай бойынша тапсырылуы тиіс

НҰР-СҰЛТАН, 10 сәуір – Sputnik. Қазақстан президенттігіне кандидаттар мен олардың жұбайлары кірісі мен мүлкі туралы декларация тапсыруы тиіс. Бұл туралы бүгін Орталық сайлау комиссиясында айтылды, деп хабарлайды Sputnik Қазақстан тілшісі.

Кезектен тыс президент сайлауы 9 маусымға белгіленген. Президенттіккке үміткерледі ұсыну 2019 жылдың 10 сәуірінен басталып, осы жылдың 28 сәуірінде сағат 18:00-де аяқталады.

Үміткер ретінде тіркелу үшін әр кандидат өзінің және жұбайының кірісі мен мүлкі туралы декларация тапсырғаны жөніндегі мемлекеттік кіріс органының анықтамасын көрсетуі тиіс. Декларация 2019 жылдың 1 сәуіріндегі жағдай бойынша тапсырылуы тиіс.

Сонымен қатар, кандидаттардан денсаулық жағдайы туралы медициналық қорытынды талап етіледі.

Кандидаттарды тіркеу осы жылдың 11 мамыры сағат 18:00-ге дейін жалғасады.

Дауыс беру 9 маусымда жергілікті уақыт бойынша 07:00-ден кешкі 20:00-ге дейін жүргізіледі. Дауыс беру аяқталған кезден бастап сайлау учаскелерінде 12 сағаттан кешіктірмей дауыстарды санау жүргізіледі.

Әкімшілік-аумақтық бірліктер бойынша дауыстарды санау нәтижелері аумақтық комиссиялардың отырыстарында белгіленеді және Орталық сайлау комиссиясына екі күн мерзім ішінде (11 маусымнан кешіктірмей) жеткізіледі.