Павлодар тұрғыны көшеде кезіккен балаларды аяусыз соққыға жықты
Қысқа сілтеме алу
Полицейлер 32 жастағы күдіктіні ұстады
ПАВЛОДАР, 18 наурыз – Sputnik. Павлодар тұрғыны көшеде жүрген балаларды ешбір себепсіз соққыға жыққан. Зорлық-зомбылыққа ұшыраған балалар жарақаттанып, миы шайқалды, деп хабарлайды Sputnik Қазақстан облыстық полиция департаментінің баспасөз қызметіне сілтеме жасап.
Құқық қорғау органдары оқиғаның 16 наурыз күні сағат 23.00–де болғанын мәлімдеді. Минин көшесіндегі үйдің маңында белгісіз ер адам тоғыз және он жастағы ер балаларға жәбір көрсеткен. Бұл жайтты полиция тіркеді.
Тәртіп сақшылары күдіктіні қолға түсірді. Ол 32 жастағы Павлодар тұрғыны болып шықты.
Полицияның баспасөз қызметі атап өткендей, бұл жағдай бойынша Қылмыстық кодекстің 293-ші бабына («Бұзақылық») сәйкес сотқа дейінгі тергеу жұмыстары жүргізіліп жатыр. Оқиғаның себептері анықталады.
Балалардың халі қалай
Зардап шеккендер Облыстық балалар ауруханасына жеткізілді.
Облыстың денсаулық сақтау басқармасының баспасөз хатшысы Эльмира Темірғалиеваның айтуынша, балаларға бірдей диагноз қойылған: Бас сүйек-ми жарақатын алған, беті мен басына зақым келген, кеуде қуысы мен мойыны көгерген.
«Зардап шеккендердің халі орташа ауыр болатын. Қазір жағдайлары бір қалыпты, тиісті медициналық көмек көрсетіліп жатыр»,- деді денсаулық сақтау басқармасының баспасөз хатшысы.
Сондай-ақ, Темірғалиева балаларды соққыға алған адамның мас болғанын атап өтті.
sputniknews.kz
