Парламентаралық ынтымақтастық артады | «Айқын» газеті

Мәжіліс төрағасы Нұрлан Нығматулин Чех республикасының Қазақстандағы төтенше және өкілетті елшісі Элишка Жигованы қабылдады. Жүздесу барысында Н.Нығматулин Чехия Қазақстанның Орталық және Шығыс Еуропадағы маңызды серіктесі екенін атап өтті.

Дипломатиялық қарым-қатынастар орнаған 25 жыл ішінде екі мемлекет ара­сын­да белсенді саяси диалог жолға қойылды. Сауда-экономикалық және мәдени-гуманитарлық ынтымақтастық үдемелі түрде дамып жатыр. Парламент­аралық үнқатысу да тиімділікке қол жеткізді. Нәти­же­сінде, қазақстандық және чех парламент­ші­лері арасында өзара әрекеттес­тік­тің жақсы тәжірибесі түзілген.
Мәжіліс төрағасы мұның – Қазақстан Президенті Нұрсұлтан Назарбаев пен Чехия Президенті Милош Земан арасындағы өзара түсіністікке негіздел­ген бірлескен жұмыс­тың жемісі екеніне назар аудартты.
Нұрлан Зайроллаұлы барлық бағыт­тағы, соның ішінде парламент­аралық деңгейдегі қазақстандық-чехиялық ынтымақтастық екі ел арасындағы қатынастардың одан әрі нығаюына септесеріне сенім білдірді.
Палата спикері Қазақстан – Еуропа мен Азия ортасындағы көпір екеніне тоқтала келе, Елбасы Нұрсұлтан Назарбаевтың келесі жылы 25 жылдық мерейтойы атап өтілетін Еуразиялық кеңістік туралы идеясының маңыздылы­ғына екпін түсірді.
– Президенттеріміздің, парламент­тері­­міз­дің, үкіметтеріміздің жұмысына негіз­дел­ген мемлекеттеріміз арасындағы өзара түсіністік бүгінде елдер қалай әріптесе, бірлесе қимылдай алатынының жақсы үлгісі саналады, – деді Нұрлан Нығматулин.
Өз кезегінде Чехия елшісі екіжақты қаты­настардың кең ауқымына назар аударт­ты. Ол Чехия үшін Қазақстан «Орталық Азиядағы ең маңызды ел» екенін баса айтты. Элишка Жигованың байламынша, Чехия Қазақстанмен Еуропалық одақта қалай бірге тиімді жұмыс жасауға болатынын паш ете алады. Дипломат сондай-ақ өзара ынты­мақ­тастықты одан әрі дамыту үшін парламентаралық ықпалдастықтың маңызын атап өтті.

Айхан ШӘРІП