ОҚУШЫЛАР ОЙ САЛДЫ | «Айқын» газеті

Алматы облысы Қарасай ауданындағы Кемертоған орта мектебінде ерекше кеш өтті. «Елімнің бақытын тербеткен – Тәуелсіздік» деп аталатын кеш егемендіктің – 27, Желтоқсан көтерілісінің 32 жылдығына арналды. 

Елбасының «Рухани жаңғыру» және «Ұлы даланың жеті қыры» мақаласында елдік рухты көтеру, жастардың бойына патриоттық нәрін себу мәселесі кеңінен қамтылады. Кемертоған орта мектебінде өткен шығармашылық кеш осы үдеден шығуға барынша тырысқан. Ұстаз­дар да оқушыларды жақсы деңгейде дайындапты. Сахнада мектеп білім­паздары емес, құдды театр артис­тері ойнап жүргендей әсер қалды­рады. Шараға танымал ақын Мұхтар Шаханов, халықаралық Мұхтар Шаханов оқулары жобасының авторы, журналист Зәмзагүл Әубәкір және «Алатау әуендері» құлан­саз ансамбль әншілерінің көркем­дік жетекшісі, әнші Гүлшат Тәкежанова шақырылған.
Кеш барысында Талжан Талғатқызы, Айшұға Абайқызы, Әли Мұқашұлы, Ермұрат Сұлтанбекұлы, Алдияр Байжан­ұлы, Қаби Мәди және тағы да басқа талантты оқушылар Тәуелсіздік туралы рухты өлеңдерді шабыттана оқып, 1986 жылғы Желтоқсан көтерілісі көріністерінен шағын спектакльді ұсын­ды. Бұл қойылым кешке қатысу­шы­ларды риза етіп, көңілін толқытты.
Бұдан соң кеш қонақтары мен оқырмандар арасында еркін сұхбат өрбіді. Оқушылар мен ұстаздар ардақты қонақтарға көкейдегі сауалын қойып, жаймашуақ көңіл күйде пікірлесті. Әлбетте, мұндай еркін диалогтың қай тарапқа да берері мол. Кеш соңына қарай «Елімнің бақытын тербеткен – Тәуелсіздік!» атты кітап көрмесі көпші­лік назарына ұсынылды.
– Мұндай кездесу Кемертоған орта мектебінде үшінші рет ұйымдастырылып отыр. Осыған дейін белгілі дәстүрлі әнші Рамазан Стамғазиев және айтулы ақын Қасымхан Бегманов ағаларымыз келіп, оқушылармен еркін пікірлесіп, жас ұландарымыздың бойына жалын сыйлап кеткен еді. Мұндай кештердің басты мақсаты – өскелең ұрпақты ұлт­тық руханиятқа, әдебиетке тарту, жақындату. Қазір өркениет деп, ұлттық тамырымыздан ажырай жаздап, шетел өнімдеріне қатты бет бұрып кеттік. Ал мектеп – балаға білім нәрін құятын, оның өмірдегі алғашқы қадамына себеп­кер болатын қастерлі орта. Сондықтан балаларға осы бастан түзу жол көрсету біздің, яғни ұстаздардың міндеті деп білдік, – дейді мектеп директорының тәрбие ісі жөніндегі орынбасары Өміртай Еділханұлы.
Мектеп басшылығының айтуынша, осындай кештерді ұйымдастыруда тек ұстаздардың ғана үлесі бар деп айтуға болмайды. Ата-аналар да әдеби кештер­ге шын ынта-ықыластарымен қатысып, кештің ойдағыдай өтуіне атсалы­сады екен.
– Мектебіміз осындай руханиятқа тәрбиелейтін шараларды жиі ұйым­дас­ты­рады. Әрине, мейлі бір сағат болсын, мейлі екі сағат болсын, мұндай кеш балаға ұмытылмас рухани азық сыйлай­ды. Келешекте ол экономист, инженер, мұнайшы, дәрігер бола жатар. Бірақ бастау бұлағы әдебиеттен, руханияттан басталса, қай істе де есесі кетпейді. Қазір­гі жастар Тәуелсіздіктің қалай келгенін, сол жолда бабаларымыздың, ағаларымыздың қалай еңбек еткенін, желтоқсан айының біз үшін неліктен қасиетті екенін біліп жүруі керек, – дей­ді ата-аналар комитетінің басшысы Сымбат Баққұлова.

А.ҚАЗБЕКҰЛЫ