Оңтүстік Кореяда қазақстандық 57 суретшінің еңбегі таныстырылды
Қазақстан Республикасының Ұлттық мұражайы Оңтүстік Кореяның Сувон қаласындағы SIMA заманауи өнер мұражайында «Еуразиялық утопия: Post Scriptum» атты көрмесін ашты. Көрме SIMA мұражайымен бірлесіп ұйымдастырылған. Экспозицияда кеңестік және қазіргі заманның 57 суретшісінің 100-ден астам туындысы бар. Көрме – «Фокус Қазақстан» халықаралық жобасы аясында өткен шетелдік іс-шаралардың төртінші әрі соңғысы.
«Фокус Қазақстан» Рухани жаңғыру бағдарламасы аясында жүзеге асып жатқан «Заманауи қазақстандық мәдениет – жаһандық әлемде» атты арнайы жобасының бір бөлігі.
– Жоба халықаралық аренадағы Қазақстанның заманауи бейнелеу өнерін ауқымды көрсете алған ұйымдастыру тәжірибесінің алғашқы және табысты мысалы бола алады, – дейді куратор Роза Әбенова. – 4 қалада (Лондон, Берлин, Джерси Сити, Сувон) 400-ге жуық жұмыс және 94 суретшінің мұрағаттық құжаттары көрсетілді. Жобаның соңында әр көрме бойынша каталогтар шығарылады.
«Еуразиялық утопия: Post Scriptum» көрмесі кеңестік кезеңнің және қазіргі заманғы суретшілердің шығармашылығын зерделеу, көркемдік дәстүрдің жалғасы мен үзілуін көрсету. Республикамыздың тәуелсіздігі кезеңіндегі қазіргі заманғы өнердің дүниеге келуін, жаңа дискурстар мен медианың пайда болуын зерттеу арқылы қазақстандық өнердің нарративін анықтауға тырысады. Ұлттық сурет өнері мектебінің ерекшеліктері, «жергілікті модернизм» феномені және тәуелсіздік кезеңіндегі өнер – осы көрменің басты тақырыптары. Көрмеде Үкі Әжиевтің, Ольга Кужеленконың, Салихитдин Айтбаевтың, Жаңатай Шәрденовтің, Евгений Сидоркиннің, Алексей Степановтың, Михаил Кимнің, Борис Пактың, Әбдірашит Сыдыхановтың, Рустам Хальфиннің, Сергей Масловтың, Сәкен Нарыновтың, Серікбай Әлжановтың, Ербосын Мелдібековтың, Елена мен Виктор Воробьевтардың, Александр Угайдың, Бақыт Бүбіқановтың, Әлібек Мергеновтің, Сәуле Дүйсенбинаның, Нұрбол Нұрахметтің және басқаларының шығармалары ұсынылды.
«Еуразиялық утопия: Post Scriptum» көрмесінің жетекшілерінің бірі қазақстандық Юлия Сорокина жергілікті модернизм феноменін, суретшілердің модернизм мұрасын сезінуі мен оның өз тәжірибелерімен ұштастыруын атап көрсетті. Ал, оңтүстіккореялық Шин Ын Янг: – Қазақстан Кореямен тарихи тұрғыдан тығыз байланысқан, бірақ, біз Қазақстанның өнері мен мәдениеті туралы тым аз білеміз. Қазақстан өнерінің алғашқы көрмесінің арқасында біздің ол туралы көбірек білуімізге мүмкіндік туды, – деп ойын жеткізді.
«Фокус Қазақстан» жобасын Қазақстан Республикасы Мәдениет және спорт министрлігі мен ҚР Ұлттық музейі ұйымдастырды.
Көрме 2019 жылдың 3 наурызына дейін жалғасады.
Асқар Алтайұлы
