Олимпиада чемпионы Елдос Сметовтың медалі қанша тұратыны белгілі болды

Қазақстандық дзюдошы Елдос Сметовтың Париждегі Олимпиадада жеңіп алған алтын медалінің қанша тұратыны белгілі болды. Бұл туралы Kznews.kz ақпарат агенттігі хабарлайды.

Олимпиада медалінің өзі – 529 грамм, бірақ ол 95,4% күмістен тұрады. Оның құрамында небәрі 6 грамм таза алтын бар. Олардың қазіргі бағасына сүйенсек, медальдің құны шамамен 950 доллар немесе 450 мың теңге болады.

Егер медаль толығымен алтыннан жасалған болса, оның құны шамамен 41 мың доллар яғни 19 миллион теңге болар еді. Соңғы рет мұндай таза алтын медаль 1912 жылы Стокгольмде өткен Олимпиадада табыс етілді.

Айта кетейік, бұған дейін Елдос Сметов Париж олимпиадасында 60 келі салмақта топ жарып, дзюдо күресінен қазақтан шыққан тұңғыш олимпиада чемпионы және үш олимпиада жүлде алған алғашқы қазақ атанған еді.