«Өлеңнің сөзін жоқ қылған»: Белгілі ақын Төреғали Төреәліні сотқа бермек

Ақын, Қазақстан Жазушылар одағының мүшесі Мұнайдар Балмолда “Қазақтың жылқылары” деген өлеңін Төреғали Төреәлі «ұрлап алғанын» айтып, әншімен сотта кездеспек. Бұл туралы Kznews.kz ақпарат агенттігі хабарлайды.

Белгілі ақын Facebook әлеуметтік желісінде жазба жариялап, әншінің адамгершілікке жатпайтын қылығын сынады.

«Менің «Қазақтың жылқылары» өлеңіме жазылған Алтынбек Каресов екеуміздің әнімізге Төреғали Төреәлінің көзі түсіпті. Түскені құрсын, ұрлап алып, сөзін жоқ қылып, оның орнына Қайнар Алагөзовке сөз жазғызып алып, бір қожалықтың әні қылып, айтып жүр екен! Тiktok-тан бір байқап қалып, ескерту жасадым. Жақсылықпен қоя ғой, менің авторлық құқығыма қолыңды сұқпа деп! Жоқ, бұл бала сөз түсінбейтін болып тұр! Ютуб арнасында, өзінің парақшасында осы ән тұр деп маған жігіттер хабарласып жатыр. Бұл әнші жігіт Алтынбекке хабарласып, әнді сұрапты. Алтынбек өзінің келісетінін айтып, бірақ «Мұнайдар ағамнан рұқсат сұраңыз» депті. Ал Төреғали мені адам екен демеген, ағам екен демеген, өзім білемге салыпты. Ал осынысы дұрыс па? Менен сұраған да жоқ. Мен рұқсат бермейтін де едім. Сөзін өзгертпей айтса, онда ойланатын едім. Ол менің сөзімді жоқ қылған ғой. Ән өлеңіме бола туды, соған арнайы жазылды! Бірінші өлең туды, соған менің тапсырысыммен ән жазылды. Сонда бұл әннің авторы кім?» – деп жазды ақын.

Сонымен қатар әдебиет өкілі әншінің ұятсыз әрекеті үшін сотқа беретінін де жасырмады.

“Сотқа берсем ше? Менің әнімді рұқсатымсыз алғаны аздай, онымен өзіне жалған абырой жинап жүр. Мұғалжар жылқысы жайлы әндетіп, біреулерден ақша алып, мейманасы тасып тұрған болар. Осылай менің Қазақтың жылқыларына, яки ұлтымыздың, халқымыздың асыл жануарына арнаған әнімді таптап өтпек, жоқ қылмақ! Сіздермен ақылдасайын деп шештім. Төреғалиды сотқа берейін бе, жоқ па? Онікі адамдыққа жата ма? Біраздан бері айтылып, тіпті бейнебаян да түсірілген әнді бұлай иемденіп алуына жол беріп қойып отыра берейін бе? Өзім соттасуды жаратпаймын. Бұл бірінші рет! «Құдайға телефон соққан бала» әңгімемді біреулер ұрлап, фильм түсіріп тастады. Оларды аяп, сотқа бермедім. Ал енді әніме шабуыл жасап отыр. Ашық күнде. Еш ұялмай, қысылмай. Бұл Төреғали атақты болсам, әумесер болсам, маған бәрі жарасады деп ойлай ма екен? Төреғали біздің «Қазақтың жылқылары» әнінен «Мұғалжар жылқылары» деген, бір аумақтың, шаруа қожалықтың әнін шығарып алған. Сізге жалпы Қазағымның жылқылары қымбат па, әлде бір ғана Мұғалжар тұқымы ма? Адамның сотына бермей, Алланың сотына тапсырайын ба? Екіншісі өте ауыр. Ол қияметке кетеді. Менен кешірім сұрап, доғара қойса, мен кешірер едім. Олай істейтін арлы азаматты, ұятты адамды әзірге көрмедім. Мен әлі аяп отырмын. Түсінер, кешірім сұрар деп. «Ұлы даланың баласымын» деп кеудесін көтеруші еді, қайда сонысы? Ұлы даланың жылқыларына арнаған әнді жоқ қылып, оның орнына бір ғана тұқымды мақтаған, ақша үшін жазылған дүниесін күйттегені ұлтты қорлағандай болды!” – деп күйінді ақын.

Жазба соңында Мұнайдар Балмолда 2019 жылы “Бөріде не арман бар” кітабында жарық көрген даулы өлеңнің сөзін жариялады.