Нұр-Сұлтан полициясы қылмыстық істі тоқтатты

Елордада «времянка» өртеніп, бір үйдің бес баласы көз жұмған еді

НҰР-СҰЛТАН, 14 маусым — Sputnik. Елорданың полиция департаменті өртеніп кеткен бес бүлдіршіннің өліміне қатысты қылмыстық істі тоқтатты, деп хабарлайды Sputnik Қазақстан тілшісі.

Полиция департаменті басшысының орынбасары Ғазиз Нұрқаевтың айтуынша, аталған істі қалалық департаменттің тергеу басқармасы жүргізген. Енді, тергеушілердің шешімін прокурорлар тексереді.

Тағы оқыңыз: Министр Әбілқасымова бес баласынан айырылған ата-анаға барып көңіл айтты 

«Бес қыздың өлімі бойынша біз толыққанды тергеу жүргіздік. Онымен департаменттің тергеу басқармасы айналысты. Барлық зерттеу мен сараптамалар, сондай-ақ, тергеу шаралары атқарылғаннан кейін аталған қылмыстық істі тоқтату туралы шешім қабылданды. Қазіргі кезде ол қалалық прокуратураға тапсырылды. Олар аталған шешімнің заңдылығын тексереді», — деді Нұрқаев елордада өткен баспасөз мәслихатында.

Еске сала кетсек, ақпанның үшінен төртіне қараған түні Астанадағы Көктал-1 тұрғын үй алабында «времянка» өртеніп, 2006, 2008, 2013, 2015 және 2018 жылы туған бес бала көз жұмды. Қаза болғандардың барлығы – қыз бала. Ең кішісінің туғанына үш ай ғана болған. Балалардың ата-анасы түнгі уақытта жұмыста болған.