НТВ телеарнасы Димаштың Мәскеудегі жеке концертін көрстеді

Концерттің телевизиялық нұсқасы үш сағатқа шақталған

НҰР-СҰЛТАН, 5 мамыр — Sputnik. Ресейдің НТВ телеарнасы танымал қазақстандық әнші Димаш Құдайбергеннің Кремль сарайында өткен үш сағаттық жеке концертін көрсетеді.

 Концерттің телевизиялық нұсқасын телеарна жексенбі, 12 мамырда көрсетеді. Айта кетейік, Димаш Құдайберген өзінің Instagram-дағы парақшасында құлақтандыру видеоролигін жариялады.

 «Димаш 24 жасында Қытай мен Британияда танымалдылыққа ие бола отырып, халықаралық деңгейдегі жұлдызға айналып үлгерді. Көптеген беделді марапаттың иегері өзінің алғашқы жеке концертін Мәскеуде елдің бас сахнасы – Мемлекеттік Кремль сарайында берді! Миллиондаған адамды арбап алған бірегей дауыс иесін қолдауға ұстаздары мен достары ғана емес, Ресей халық әртісі Игорь Крутой да келді», — деп жазылған ресейлік телеарнаның сайтында.   

 Естеріңізге сала кетейік, 22 наурызда Димаш Құдайберген өзінің алғашқы жеке концертін Кремль сарайында өткізді. Билеттер лезде сатылып кеткендіктен, әртіс жанкүйерлерін 23 наурыздағы екінші концертімен қуантты. Қазақстандық әншінің шығармашылық кешіне әлемнің 56 елінен жанкүйер жиналды.

 Димаш 2019 жылдың 7 маусымында «Муз-ТВ жүлдесінің» арнайы қонағы болады. Сонымен қатар, жас орындаушы 29 маусымда Қазақстанның астанасында өзінің жеке концертін өткізеді.