Мұқтаж отбасының пәтер жалдау ақысын төлеп берген ақтөбелік полицей марапатталды

0
12

Қоғам

Қысқа сілтеме алу

1 0 0

Ақтөбеде учаскелік полиция қызметкері Бақтияр Жақыпов екі лауазымдық жалақы көлемінде сыйақыға ие болды

НҰР-СҰЛТАН, 30 сәуір – Sputnik. Мамыр айындағы мерекелер қарсаңында ішкі істер министрі Ерлан Тұрғымбаев төтенше жағдай кезінде қызметте ерекшеленген 47 қызметкер мен әскерилерді марапаттады, деп хабарлайды Sputnik Қазақстан.

«Марапатқа ие болғандардың қатарында Ақтөбе қаласының учаскелік полиция инспекторы Бақтияр Жақыпов та бар», – делінген Ақтөбе облыстық полиция департаментінің баспасөз қызметі таратқан ақпаратта.

Жақыпов ведомство басшысының арнайы бұйрығымен министрліктің құрмет грамотасымен марапатталды. Сонымен қатар, облыстық полиция басқармасы бастығының бұйрығымен оған екі лауазымдық жалақы мөлшеріндегі сыйақы тағайындалды.

Айта кетейік, 23 сәуір күні Чекалин көшесіндегі жалдамалы пәтердің иелері жалға алушыларды үйінен шығаруға тырысып, учаскелік полиция қызметкерін шақырған. Екі жас баласы бар отбасының пәтер жалдау ақысын төлейтін ақшасы болмаған. Ал отағасы төтенше жағдайға байланысты жұмысынан айрылған.

Учаскелік полиция инспекторы отбасының қиын жағдайға тап болғанын көріп, алдағы айдың пәтер жалдау ақысын өз қаражаты есебінен төлеп береді. Бұл туралы ақпарат әлеуметтік желілерде кең таралып, кейіпкер көпшіліктің ықыласына бөленді.

Оқи отырыңыз: Карантин кезінде ажырап қалған: полиция балаларды ата-анасымен қауыштырды – видео

Ішкі істер министрі Ерлан Тұрғымбаев төтенше жағдай кезінде полицияның тәртіпті қамтамасыз етуге қосқан үлесін мемлекет басшысы жоғары бағалайтынын атап өткен. Сонымен қатар, карантиндік шараларға қатысқан барлық қызметкерлер мен әскери қызметшілер лауазымдық жалақы мөлшерінде сыйақы алады. Жалпы алғанда барлығы 52 мыңнан астам қызметкер марапатталады.



sputniknews.kz