“Мүгедек балаларға арналған 22 млн теңгені өзі жұмсаған“. Перизат Қайратқа қатысты жаңа істің мән-жайы

23 қаңтарда Перизат Қайратқа мүгедек балаларға арналған оңалту орталығын салу үшін ақша жинауға қатысты жаңа қылмыстық іс тіркелді.

Қаржылық мониторинг агенттігінің мәліметінше, ол 2021 жылы Ақмола облысында «Батыр» қоғамдық бірлестігіне арналған қайырымдылық аукционын ұйымдастырып, 48 миллион теңге жиналғанын және 100 миллион теңгеге ғимарат сыйға тартылғанын мәлімдеген. Алайда, шын мәнінде аукционда 22 миллион теңге жиналып, бұл қаражатты Перизат Қайрат жеке қажетіне жұмсағаны анықталды.

Қаржылық мониторинг агенттігінің мәліметінше, Перизат Қайрат «Батыр» қоғамдық бірлестігі үшін құны 30 миллион теңге жер телімін сатып алғанын айтқан, бірақ шын мәнінде бұл жер телімін бірлестік 2019 жылы өзі сатып алған.

Сонымен қатар, оңалту орталығының құрылысы әлі басталмаған, ал орталыққа берілді делінген ғимарат мүлдем жоқ болып шыққан. Қазір соталды тергеу жалғасып жатыр.