Мұғалімдер мен дәрігерлердің мәртбесі туралы заң қабылданады
Қысқа сілтеме алу
Қазақстанды одан әрі дамыту үшін Қасым-Жомарт Тоқаев ұсынған бағыттардың бірі — әлеуметтік әділ саясат
НҰР-СҰЛТАН, 12 маусым – Sputnik. Қазақстан президенті Қасым-Жомарт Тоқаев мұғалімдер мен дәрігерлердің мәртебесін көтеретін жаңа заңдар қабылданатынын мәлімдеді, деп хабарлайды Sputnik Қазақстан тілшісі.
Елордада Қазақстанның жаңадан сайланған президентін ұлықтау рәсімі өтті. Салтанатты рәсімнен кейін Қасым-Жомарт Тоқаев Қазақстанды одан әрі дамытудың он бағытына тоқталды. Соның алтыншы бағыты – әділетті әлеуметтік саясат жүргізу.
Мемлекет басшысы атап өткендей, билік адам капиталын дамыту саясатын жалғастырмақ.
«Бұл бағытта, ең алдымен, не істеуіміз қажет? Жаппай білім беруді қолдау және барлық тұрғынға сапалы медициналық қызмет көрсету. Біз мұғалімдердің және дәрігерлердің мәртебесін көтеретін жаңа заңдар қабылдаймыз. Олардың құқығын қорғап, материалдық жағдайын жақсарту үшін тиісті жағдай жасаймыз», — деді президент.
Айта кетсек, бүгін Нұр-Сұлтандағы Тәуелсіздік сарайында Қазақстан тарихындағы екінші президентті ұлықтау рәсімі өтті. Қасым-Жомарт Тоқаев мемлекеттік тілде ант беріп, президент қызметіне ресми түрде кірісті.
Тағы оқыңыз: Тоқаев халықты толғандырған басты мәселені атады
9 маусымда өткен президент сайлауында Тоқаев дауыс берушілердің 70,96 процент даусын жинап, жеңіске жеткен еді.
sputniknews.kz
