Мәжіліс депутаттары демалысын кейінге қалдырды
Қысқа сілтеме алу
Парламент депутаттары бірінші шілдеден каникулға кетуі тиіс еді
НҰР-СҰЛТАН, 26 маусым – Sputnik. Төменгі палата депутаттары биыл демалысқа әдеттегідей маусым айының соңында емес, 10 шілдеден кейін шығады. Бұл туралы депутат Василий Олейник айтты, деп хабарлайды Sputnik Қазақстан тілшісі.
Оның айтуынша, мәжіліс маңызды заң жобаларын қарау үшін сессияны 10 шілдеге дейін ұзартқан.
«Біз сессияны 10 шілдеге дейін создық. Жұмыс істейміз. Қабылдайтын көптеген заң жобасы бар, сондықтан сессия ұзартылды», — деді Олейник БАҚ өкілдеріне.
Демалыстың алдында қаралатын маңызды құжаттардың арасында мемлекеттік қызметтер туралы заң жобасы бар.
Сонымен қатар, депутаттар әкімшілік рәсімдік-процессуалдық кодекске өзгерістер енгізуді де жоспарлап отыр.
«Сіздер білесіздер, мен заңнама жән сот-құқықтық реформа комитетінің мүшесімін. Біз жуырда Ақтауда сот-құқық жүйесін жаңғырту мәселелері бойынша көшпелі отырыс өткіздік. Бірқатар заңнама түсті, атап айтсақ, әкімшілік рәсімдік-процессуалдық кодекс те бар. Жұмыс өте көп,» – деді депутат.
Олейниктің айтуынша, 10 шілдеден кейін депутаттар сайлаушылармен кездесу үшін өңірлерге аттанады.
sputniknews.kz
