Марқұм Салтанат Нүкенованың ата-анасы сот отырысынан кейін ауруханаға түсіп қалды – Адвокат

Марқұм Салтанат Нүкенованың ата-анасы – Амангелді және Жұмагүл Нүкеновтар сотта оқиға орнындағы суреттерді, BAU мейрамханасының бақылау камераларындағы жазбаны көргеннен кейін және сот-медициналық сараптама қорытындысын тыңдаған соң өзін жайсыз сезініп, ауруханаға жатқызылған. Бұл туралы Kznews.kz ақпарат агенттігі хабарлайды.

Зардап шеккен тараптың адвокаты Жанна Уразбахова осылай деп мәлімдеді.

“Ата-анасы бұл суреттерді көрмеген еді, содан кейін ауруханаға жатқызды – анасын да, әкесін де. Қазір олардың жағдайы жақсы емес, сол себепті сот отырысына барып жүрген жоқ. Ол (Қуандық Бишімбаев – ред.) біресе құлады, унитазға соғылды, қабырғаға соғылды деп, қандай құралдары болғаны туралы салқынқанды және қысылмай айтып отыр. Қабырға, унитаз, еден – бәрі кінәлі, тек ол емес. Сол себепті біз айыптау нұсқасында қаламыз. Бұл арсыздықпен жасалған адам өлтіру деп есептейміз”, – деді Уразбахова.

Еске салайық, Бұрынғы ұлттық экономика министрі Қуандық Бишімбаев әйелі Салтанат Нүкенованы өлтірді деген күдікпен ұсталған. Кейіннен қылмысты жасырды деген айыппен Салтанат Нүкенова көз жұмған мейрамхананың директоры да тұтқындалды. Бұдан бөлек экс-министр Қуандық Бишімбаевқа Қылмыстық кодекстің 110-бабы 2-бөлігі («Азаптау»), Қылмыстық кодекстің 99-бабы 2-бөлігі 5-тармағы («Аса қатыгездікпен адам өлтіру») бойынша жаңа айыптар тағылған еді. Ал оның туысы Бақытжан Байжанов – қылмысты жасырғаны және хабарламағаны үшін айыпталған еді.

4 сәуірде айыпталушы Қуандық Бишімбаев сот алдында жауап берді. Бұған дейін сотта Салтанат Нүкенованы мейрамхананың дәлізінде ұрып-соғып жатқаны түсірілген видео көрсетілген.

Сонымен қатар Жоғарғы сот әйелі Салтанат Нүкенованы өлтірді деп айыпталған бұрынғы экономика министрі Қуандық Бишімбаев қандай жағдайда өмір бойына бас бостандығынан айырылуы мүмкін екенін айтты.