Мәди Манатбек «Отандастар» АҚ вице-президенті болды
Журналист Мәди Манатбек «Отандастар» АҚ вице-президенті болып тағайындалды. Бұл туралы заңгер Абзал Құспан Facebook-тегі жеке парақшасында жазды.
«Досымыз Мәди Манатбекті «Отандастар» АҚ вице-президенті қызметіне тағайындалуымен «қызу» құттықтаймын! Оралман бауырлардың мәселесін шешуде шешуші рөл атқаруға қауқарлы бұл мекемеде «өз адамымыз» болғаны біз үшін өте маңызды! ҚҰТТЫҚТАЙМЫЗ!», — деп жазды заңгер парақшасында.
Мәди Манатбек 1978 жылы 25 мамырда дүниеге келген. 2006 жылы Көкшетау университетінде заңгер мамандығын меңгерген. Еңбек жолын 1998 жылы республикалық «Нартәуекел» газетінде тілшілік қызметтен бастаған. Еңбек жолы 1999 жылы қалалық «Шымкент келбеті» газетінде жалғасты. 2000 жылдан бастап «Отырар» телеарнасында жаңалықтар жүргізушісі, таңғы «Нұрлы арай», спорттық «Топжарған», қылмыстық «Экстренный вызов» бағдарламаларының авторы әрі жүргізушісі болды.
2001-2006 жылдары «Астана» телеарнасында жаңалықтар жүргізушісі, апталық ақпараттық-сараптамалық «Үш ширек», «Ашық әңгіме», спорттық «Топжарған», қылмыстық «Оқиға ізімен» бағдарламаларының авторы әрі жүргізушісі және бағдарламалар өндірісі қызметінің жетекшісі болды.
2006 жылы «31 арна» Астана қосынының тілшісі, 2007 жылы «MARMILAT» жарнама агенттігінің директоры. 2008 жылы «Хабар» Агенттігі» АҚ жаңалықтар қызметінің жүргізушісі. 2010-2013 жыл аралығында «Қазақстан» РТРК» АҚ апталық ақпараттық-сараптамалық «Аptа.kz» бағдарламасының жүргізушісі; қоғамдық-саяси бағдарламалар бөлімінің жетекшісі, «Қазақстан» РТРК» АҚ Басқарма төрағасының орынбасары қызметтерін атқарды.
2013 -2017 жылдары «BAQORDA media group» ЖШС Бас директоры.
2017 жылдың ақпанынан 2018 жылдың қыркүйегіне дейін «Республикалық радио» ЖШС бас директоры болды.
