Kaspi арқылы ақша аудару: қаржы министрлігі шешім қабылдады

Қаржы министрлігі ақша аударымдарын тексеруге қатысты түсініктеме беріп, алаңдауға еш негіз жоқ екенін айтты

НҰР-СҰЛТАН, 14 қараша – Sputnik. Қаржы министрлігі қазақстандықтардың ақша аударымдарын тексеруді жоспарлап отырған жоқ. Бұл туралы бүгін бірінші вице-премьер – қаржы министрі Әлихан Смайылов айтты, деп хабарлайды Sputnik Қазақстан.

«Қаржы министрлігі жеке тұлғалардың ақша аударымдарын тексеруді, аударымдардан қандай да бір қосымша төлем немесе салық алуды жоспарлап отырған жоқ», — деп атап өтті Смайылов.

Айтуынша, ведомство банктермен бірігіп, қолма-қол ақшасыз төлемдерді іске асыру бойынша ыңғайлы және заманауи инфрақұрылымды дамыту бағытында жұмыс істейді.  

Кәсіпкерлік қызметке тоқталған министр оның ашық болуы тиіс екенін атап өтті. Атап айтқанда, кәсіпкерлер заңнамаға сәйкес, фискалды чек беруге, ал 2020 жылдың 1 қаңтарынан бастап онлайн бақылау-касса машиналарын қолдануға міндетті.

«Кәсіпкерлік мақсатта Kaspi-ді пайдалану кәсіпкерлерді бұл міндеттемелерден босатпайды. Чек тұтунышылардың құқығын қрғау үшін өте маңызды», — деді ол.

Тағы оқыңыз: Перуашев қара халықты қорқытып-үркіткен вице-министрдің мәлімдемесіне шүйлікті

Вице-премьердің сөзінше, министрлік жедел аударым жасау жүйесін пайдаланатын кәсіпкерлердің табысын әкімшілеу мәселесін пысықтап жатыр. Мәселен, бұл онлайн-касса машиналары мен автоматты түрде толтыру және салық есебін жіберу функционалы бар POS-терминалдарды біріктіру арқылы.  Мұндай пилот келесі жылы Kaspi банкпен бірге өткізіледі.

«Осыған байланысты халыққа алаңдауға еш негіз жоқ», — деді Смайылов.

Сондай-ақ, ведомство 2020 жылдың 1 қаңтарынан арнайы салық режимдерін қолданатын микро және шағын бизнес 3 жылға салық мен тексерістен босатылатынын еске салды.