Иран жақын күндері ғарышқа спутник ұшыратынын растады

0

Иран жақын күндері ғылыми зерттеу спутнигін ұшыратынын растады. AFP агенттігіне берген сұхбатында Иранның ұлттық ғарыш агенттігінің басшысы Мортеза Берари дегенмен Зафар (парсы тілінен аударғанда «жеңіс») спутнигін нақты қашан ұшыратынын айтпады. Оның айтуынша, 113 кило салмағы бар спутник Simorgh зымыран-тасығышымен ұшырылады және Жерден 530 шақырым қашықтықта орналасып, күніне 15 рет айналады.

Бес күн бұрын Иранның ғарышқа спутник ұшыруға дайындалып жатқаны туралы хабарлама тарап, спутниктің суреті де пайда болған. Былтыр Иран үш рет зымыран ұшырып, үшеуі де сәтсіз аяқталған. Кейбір Батыс елдері Иранды спутник ұшыруда баллистикалық зымыранды құрастыру үшін қолданылатын технологияны пайдаланады деп айыптайды. Берари ақпарат агенттігіне Иран «ғарышты бейбіт пайдалануды» қолдайды деп айтқан.

«Біз ғарыш саласында барлық жұмысты ашық атқарып жатырмыз» деді Мортеза Берари .

Өткен жылы қаңтар және ақпан айларында Пайям және Дусти («Достық») спутниктерін ұшыру сәтсіз аяқталып, тамыз айында спутникті ұшыру кезінде ғарыш айлағында зымыран жарылған.

Azattyq

Загрузка...

ПІКІР ҚАЛДЫРУ

Пікіріңізді енгізіңіз!
мұнда сіздің атыңызды енгізіңіз