Ілгері жүру мен ірілену | «Айқын» газеті

Бастауыш партия ұйымдарының республикалық форумына қатысқан ақтөбеліктер өңірге оралған соң цифрландыру, көшбасшылықты сақтау, саннан сапаға көшу жұмыстарын талқылады. Бұл ретте, еркін ой мен ұсынысқа жол ашық. Тың идеяға қолдау бар. 

Республикалық форум делегаттары «Нұр Отан» партиясының бастауыш партия ұйымдары мүшеле­рімен кездесу өткізді. Кездесуде фо­рум­ның қорытын­дысы талқыланып, бастауыш партия ұйымдарының қыз­метін трансфор­ма­циялаудың негізгі бағыттары түсін­ді­рілді. «СНПС-Ақтө­бемұнайгаз» АҚ БПҰ төрағасы Абай Сақ­тағановтың айтуынша, партия фи­­лиалдары мен бас­тауыш партия ұйым­дарының ал­дында тұрған басым ба­ғыттардың бірі – Елбасы Нұрсұлтан Назарбаев Жолдауының стратегиялық маңызын түсініп, оны тиімді іске асы­ру. Осы бағытта қоғамдық бақылау жұмыстарын күшейтіп, оның мәні мен маңызын әр қазақстандыққа жеткізу қа­жет. Саяси доктринаның негізгі құн­ды­лықтарын және партияның сай­лау­алды бағдар­ламасын түсіндіру, бас­тауыш ұйымдарға жергілікті халықтың проблемалары, әлеуметтік қақтығыстар туралы жедел ақпараттандыру міндеті жүктелген.
«Форумда айтылған мәселенің ­бірі – саннан сапаға көшу. Қатарымызға халықтың мәселесін көтеретін, ойын ашық айта алатын жастарды, белсенді азаматтарды тартуымыз қажет. Яғни, белсенді азаматтар мен жастарды жұ­мыл­дыру арқылы партия жұмысын күшейтудің маңызы зор», – деді Абай Сақтағанов. Бұл ойды облыстық мәс­лихаттағы «Нұр Отан» фракция­сы­ның мүшесі Хайдар Ілиясов толықтырды.
«Саяси көшбасшылықты сақтау үшін бізге партиялықтардың қатарын нығайту қажет. Осыған байланысты партияға қабылдау үрдісі жетілдіріледі. Бұл партияға кіруге ниет біл­дірген үміткерлерді іріктеу рәсімдеріне де, сондай-ақ партияның қалыптасқан мүшелерінің қозғалысы мен дамуын есепке алу процесіне де қатысты бола­ды», – деді Хайдар Ілиясов.
Бастауыш ұйымдарының халықпен жұмысын арттыру үшін төрағаларды идеология, менеджмент, психология саласына оқыту керек. Бұл адамдармен жұмыс істеп, елді түсінуге, елдегі сая­сатты жеткізуге, тиімді ұсыныстар қабылдауға мүмкіндік береді. Сондай-ақ цифрлық технологияларды кеңінен қолданып, «Цифрлы партия» жобасын жүзеге асыруда белсенді әрекет ету тапсырмасы бар.
«Тұжырымдамада баяндалған ішкі партия жұмысының жаңа форматы БПҰ қызметіндегі жаңғырту үде­ріс­терін жандандыруға және «Нұр Отан» пар­тия­сының көшбасшылық ұста­нымын ны­ғайтуға ықпал ететініне се­німді­мін», – деп сөзін қорытын­ды­лады Хайдар Ілиясов.
Қазіргі кезде Ақтөбеде 257 бастауыш партия ұйымы бар. «Трансэнерго» АҚ-дағы бастауыш партия ұйымы респуб­лика бойынша «Өрлеу» номинациясын жеңіп алды.

Алтынай САҒЫНДЫҚОВА, Ақтөбе облысы