Халық Қаһарманы жас патриоттармен жүздесті

Бұл шараға орталықтың бас директоры Мұхитдин Тө­леп­бай, «Нұр Отан» партия­сы Қап­шағай қалалық фи­лиалының төраға­сы Ержан Нұр­пейісов жəне Қап­шағай қала­сындағы Ауған соғы­сының ардагерлері қатысты.

«Біз барлығымыз патриотпыз! Патриот болу дегеніміз – өз Отаныңды шын жүрегіңмен сүю, өзіңе және өз халқыңа се­ніп, қоғамға қызмет ету», деп сөз бас­таған кешегі жауынгер, бү­гінгі халық қалаулысы өзі­нің ба­ла­лық шағы мен әскери өмірі ту­ралы әңгімеледі. Ауған дала­сын­да көрген қиян-кескі тір­лік­­тен айтқан естеліктері бала­лар­ға бейбіт күннің бере­кесін ұқтыр­ғандай болды. 

«Сендер бақыттысыңдар, – деді Халық Қаһарманы, – бейбіт елде өмір сүріп жатырсыңдар, болашаққа деген сенімдерің зор. Алдарыңда өркениетті өмірдің есігі ашық. Өз тарихын, өз тілін білмейтіндер патриот бола алмайды. Мәңгілік елдің мәңгілік тілін сақтаңдар. Ең бастысы – Отанды сүю, тарихты құрметтеу керек. Сендерге айтар өсиетім осы!». 

Тәуелсіз елдің бүгінгі жасы патриот болуы керектігін айтып, 2016 жылдан бері жұмыс істеп келе жатқан «Қазақ­стан­дық жас патриоттар академия­сы­ның» тынысымен танысып, дән риза болды. Белсенді оқушы­ларға «Қазақстанның жас патриоттары» төсбелгісін тапсырды. Кездесу барысында биылғы Елбасының Жолдауында көтеріл­ген мәселелер де айтылып, ұс­таз мәр­тебесін көтеру, оқу­шы­­лар­дың мұғалімдерін құр­мет­теуі, қадір тұтуы, қоғамда оң көз­қарас қалыптастыру да әңгіме арқауына айналды. 2019 жылғы Жастар жылы бойынша да тағылымды талқылау жасалды. Себебі орталықта еңбек ететін қызметкерлердің дені – жастар. «Жастар қашанда мемлекет саясатының басында тұрады, қандай да бір жаңа бастама болса, жастар оны қолдап жүзеге асырады. Сондықтан жастардың бойында азаматтық пен қазақстандық патриотизмді қалыптастыруға, әлемдік және отандық мәдениет жетістіктерін оқып үйренуге, инновацияларды меңгеруге қабілеттері жетеді», деген қа­һар­ман қазаққа оқушылар өздерінің көкейлеріндегі сұрақ­тарын қойды. Сұраққа жауап беру сәтінде ол балаларды кітап оқуға, оны оқып қана қоймай, өз өміріне қажет­ті серік етуге, спорттың түрлі салаларымен айналысуға, өнер­ді, қазақи болмысымызға тән мұ­ра­л­арды танып білуге, отан­дық және әлемдік әдебиет мұра­ларын бағалауға шақырды. 

Кездесу соңы Халық Баты­ры Бауыржан Момышұлы­ның «Жастарымыз отаншыл болсын … Ал отаншылдық өз үйің­нен басталады. Кімде-кім ата-анасын ардақтаса, сол ата-анадан бірге туған бауыр­лармен тату болса, өзінің өс­кен ауыл, қаласын, ту­ған ұл­тын сыйлап, қадірлесе сол адам патриот, отаншыл болады» деген түйінді сөзімен қорытындыланды. 

Бұдан кейін «Балдәурен» респуб­ликалық оқу-сауық­тыру ор­та­­лы­ғының басшысы М.Тө­леп­бай Бақытжан Ертаевқа ал­ғыс хат тапсырды. 

Гүлнар ҚҰЛЖАНОВА, 

«Балдәурен-Қапшағай» РОСО әдістемелік бөлімінің меңгерушісі 

Алматы облысы